Петр Третьяков – Арассыыйа буойуна уонна Черскэй баһылыга

«Черскэй бөһүөлэгин баһылыгын дуоһунаһыгар анал байыаннай дьайыыга кыттыбыт икки дьоһуннаах хандьыдаат туруоруммуттара. Быыбар кыайыылааҕынан Петр Третьяков буолла, кини быыбардааччылар саамай элбэх куоластарын, өйөбүллэрин ылла. Саҥа салайааччыны ис сүрэхтэн эҕэрдэлиибин! Оройуон дьаһалтата кини дойдутугар төннүбүтүн кэннэ тутатына, саҥа хайысхаҕа бары сөптөөх көмөнү уонна өйөбүлү оҥоруоҕа», — диэн Аллараа Халыма улууһун баһылыга Ярослав Бандеров иһитиннэрдэ.

Петр Третьяков Аллараа Халыма улууһун Андрюшкино сэлиэнньэтигэр төрөөбүтэ. Элбэх оҕолоох ыалга улааппыта. Кэлин дьиэ кэргэнинэн Черскэй бөһүөлэгэр көспүтэ, Петр манна оскуоланы бүтэрбитэ. Үөрэх кэннэ кини автослесарь уонна электрогазосварщик идэлэрин баһылаабыта. Аармыйаҕа ыҥырыллыбыта уонна сулууспатын бүтэрэн баран баһаарынай сулууспаҕа үлэлээбитэ. 2022 сыллаахха анал байыаннай дьайыыга мобилизацияламмыта уонна 155-с гвардейскай муора пехотатын биригээдэтин састаабыгар киирэн, рядовойтан сержаҥҥа уонна штурмовой взвод хамандыырын солбуйааччытын буолбута.

Бойобуой үтүөлэрин иһин Петр Третьяков үрдүк судаарыстыбаннай наҕараадаларынан бэлиэтэммитэ диэн «Биир ньыгыл Арассыыйа» баартыйа Саха сиринээҕи салаата иһитиннэрэр.

Бүгүн Петр Максимович байыаннай чааһыгар сөптөөх докумуоннары оҥорсо сылдьар. Дьиэтигэр төннөрүн күүтэр, кинини дойдутугар улахан дьиэ кэргэнэ уонна аймахтара: кэргэнэ, төрөппүттэрэ, убайа уонна балтылара күүтэллэр. Улахан оруолу эбээтэ Акулина Иннокентьевна ылар, кини хотугу төрүт омуктар бэрэстэбиитэллэрэ. Эбээтин олоххо тутуһар тосхоло уонна сүбэлэрэ эдэр баһылыкка быһаарыыны ылынарга, көнө сүрүннээх, эппиэтинэстээх уонна бэйэтин дьыалатыгар бэриниилээх буоларга көмөлөһөллөр.

Талыллыбыт баһылык үлэтэ нэһилиэнньэ олоҕун усулуобуйатын тупсарыыга, социальнай уонна инженернэй инфраструктураны сайыннарыыга, нэһилиэк ураты култууратын уонна устуоруйатын үгэстэрин өйүүргэ туһуланыаҕа.