Пиэрмэҕэ икки киһини кулут оҥостуу дьыаланан суута саҕаланна

Ньурба улууһун Күндээдэ сэлиэнньэтигэр буолбут дьулаан түбэлтэ элбэх дьону долгуппута. Санатан эттэххэ, онно икки эр киһи – биирдэстэрэ олохтоох пиэрмэр икки үлэһити кулут оҥостон, кырбыы-сынньа сылдьыбыттар. Кинилэртэн биирдэстэрэ күрээн быыһаммыт уонна полицияны ыҥырбыт.

Олунньу 2 күнүгэр СӨ Ньурбатааҕы оройуонун суутугар икки киһини күүһү туһанан уонна куттаан кулут оҥостон үлэлэппиттэрин иһин буруйданар Ньурба улууһун икки олохтооҕун утары холуобунай дьыаланы көрүү саҕаланна (РФ ХК 127.2 ыст. 2 ч. «а», «г» пп.).

Эрдэтээҥҥи силиэстийэ быһаарбытынан, былырыын кулун тутар 2 күнүттэн муус устар 2 күнүгэр диэри буруйданааччылар күүһү туһанан уонна куттаан, 1971 уонна 1994 с.т. икки эр киһини күүстэринэн үлэлэппиттэр, ол дьон үлэлииллэриттэн бэйэлэриттэн тутулуга суох биричиинэнэн аккаастанар кыахтара суох эбит.

СӨ Борокуратуурата эрдэ иһитиннэрбитинэн, эмсэҕэлээччилэртэн биирдэстэрин оттуллубат баанньыкка, онтон олорорго табыллыбат хотоҥҥо күүстэринэн тута сылдьыбыттар. Үлэлэтээри уонна куттуулларыгар кинини мэлдьи кырбыыллар эбит. Ону таһынан, наручнигынан уонна сыабынан хотон баҕанатыгар баайаллара биллибит. Бу кырбааһыннар түмүгэр эмсэҕэлээччи элбэх ойоҕос уҥуоҕа уонна түөһүн уҥуоҕа тостубут, доруобуйаҕа орто ыар буортуну оҥоруунан сыаналаммыт, ону таһынан да атын элбэх этин-сиинин эчэппиттэр.

Иккис эмсэҕэлээччи эмиэ кырбаммыт, психологическай баттааһыҥҥа, кырбаан өлөрүөхтэринэн куттааһыҥҥа түбэспит. Эмсэҕэлээччилэр пиэрмэр хаһаайыстыбатыгар үлэлэрэ ыарахан, өрөбүлэ, хамнаһа суох, тутар усулуобуйалара мөлтөх, мэдиссиинэ көмөтө оҥоһуллубат эбит. Буруйданааччылар кулуттуу үлэттэн материальнай барыс ылаары, кинилэр олохторун толору хонтуруоллаабыттар. Буолбут быһылаан түбэспиччэ, биир эр киһи пиэрмэр хаһаайыстыбатын сириттэн күрээн, көмө көрдөспүтүн кэннэ биллибит. Силиэстийэ көрдөһүүтүнэн суут биир буруйданааччыга хаайарга хааччахтыыр миэрэни талбыт. Буруйданааччылары күүһү туһанан уонна куттаан икки киһини кулут оҥостон үлэлэппиттэрин иһин сууттуохтара (РФ ХК 127.2 ыст. 2 ч. «а», «г» пп.).

Кулуттааһын…