«Пилоты Будущего» чөмпүйэнээт кыайыылааҕынан Уус Алдан улууһун хамаандата буолла

Дьокуускайга оҕолор уонна ыччаттар ортолоругар «Пилоты Будущего»  Бүтүн Арассыыйатааҕы чөмпүйэнээт Саха сиринээҕи сүүмэрдиир түһүмэҕэ түмүктэннэ.

Тэрээһин Дьокуускайдааҕы. П.И. Дудкин аатынан сибээс уонна информационнай технология кэллиэһигэр ыытылынна.  Икки күн устата Алдан, Бүлүү, Үөһээ Бүлүү, Горнай, Ньурба, Сунтаар, Мэҥэ Хаҥалас, Таатта, Уус- Алдан, Чурапчы улуустарыттан  уонна Дьокуускай куораттан 17 хамаанда тиэхиниичэскэй  тургутуулары ааһан, дьүүлүүр сүбэ иннигэр пилота суох дроннары көтүтүүгэ симулятордарга күрэхтэстилэр. Ону сэргэ оҕолорго «Пилоты Будущего» бырайыак теоретическай билиилэрин эмиэ бэрэбиэркэлээтилэр.

Бастакы категорияҕа «Пилоты Будущего» чөмпүйэнээт кыайыылааҕынан  Уус Алдан улууһуттан «Уолан» хамаандата буолла. Иккис миэстэни Үөһээ Бүлүү улууһуттан «Скай Алениксаш» хамаандата, үһүс миэстэни Мэҥэ Хаҥалас улууһуттан «Ястреб 2» хамаандата ыллылар.

Иккис категорияҕа Дьокуускай куораттан «Экодрон» хамаандата бастаата, иккис миэстэ Сунтаар улууһуттан «Северных орлы» хамаандата, үһүс миэстэ Дьокуускай куораттан «Арктика» хамаандата буоллулар.

Бастакы категориялаах бастыҥ инженер-тиэхиник аатын  «Скай Алениксаш» (Үөһээ Бүлүү улууһа) хамаандаттан Александр Иванов сүктэ. Иккис категориялаах бастыҥ инженер-тиэхиник аатын Эдуард Колодезников «Экодрон» хамаандаттан (Дьокуускай куорат) тутта.

Бастакы категориялаах пилотунан Мичил Николаев «Уолан» (Уус Алдан улууһа) хамаандаттан, оттон 2 категорияҕа бастыҥ пилотунан Кирилл Колтовской «Экодрон» (Дьокуускай куорат) хамаандаттан буоллулар.

Кыайыылаахтарынан Москваҕа финальнай түһүмэххэ кыттар Саха сирин хамаандата тэриллиэҕэ.

Сиһилии манна көрүҥ.

СӨ Ил Дарханын уонна Бырабыыталыстыбатын пресс-сулууспата