ПМЭФ-2025: «Газпром нефть» уонна Саха сирэ бииргэ үлэлиэхтэрэ

«Газпром нефть» уонна Саха Өрөспүүбүлүкэтэ стратегическэй партнердаһыы туһунан сөбүлэҥ түһэристилэр.

Докумуоҥҥа Петербурдааҕы норуоттар икки ардыларынааҕы экэнэмиичэскэй пуорумҥа тэрилтэ бырабылыанньатын бэрэссэдээтэлэ Александр Дюков уонна эрэгийиэн баһылыга Айсен Николаев илии баттаатылар.

Сөбүлэҥҥэ эрэгийиэн социальнай-экэнэмиичэскэй уонна научнай-технологическай сайдыытыгар туһуламмыт бииргэ үлэлээһин сүрүн хайысхалара быһаарылыннылар. Өрүттэр өрөспүүбүлүкэ сиригэр-уотугар углеводородтары көдьүүстээхтик уонна айылҕаҕа сэрэхтээхтик хостооһуҥҥа бастыҥ технологиялары киллэрии боппуруостарыгар бииргэ үлэлэһэргэ сөбүлэстилэр.

«Газпром нефть» Саха сиригэр хас да бөдөҥ ньиэп-гаас бырайыактарын олоххо киллэрэр. Чуолаан, хампаанньа Чайыҥда ньиэптээх-гастаах сирин кырыытыттан хостооһуну ыытар, Саха Өрөспүүбүлүкэтин уонна Иркутскай уобалас кыраныыссаларыгар Чона учаастактарын бөлөҕүн баһылыыр. Ону тэҥэ партнердар «Газпром нефть» ньиэби өрөспүүбүлүкэҕэ тиэрдиитин кэҥэтэр туһунан ырыттылар.

Хампаанньа Саха сирин тэрилтэлэрин бэнсиининэн уонна дизельнэй уматыгынан, суол, аэродром, бырамыысыланнай тутууга уонна хомунаалынай хаһаайыстыбаҕа аналлаах аныгы битумнарынан хааччыйар.