ПМЭФ-2025: Саха сирэ уонна ГТЛК Дьокуускайга уопсастыбаннай тырааныспары саҥардыы туһунан кэпсэттилэр

Бэс ыйын 18 күнүгэр Санкт-Петербург куоракка норуоттар икки ардыларынааҕы экэнэмиичэскэй пуорум чэрчитинэн Ил Дархан Айсен Николаев «Государственная транспортная лизинговая компания» АХ генеральнай дириэктэрэ Евгений Дитрихтиин көрүстэ.

Көрсүһүү сүрүн тиэмэтинэн Дьокуускай куоракка оптуобус пааркатын саҥардыыта буолла.
Билигин Дьокуускай куорат уопсастыбаннай тырааныспарын аҥаара — 46,6 %-на куттала суох буолуу аныгы ирдэбилигэр сөп түбэспэт. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

«Дойду Бэрэсидьиэнэ Владимир Путин бигэргэппит Дьокуускай куорат агломерациятын маастар-былаанын чэрчитинэн, 2030 сылга диэри 234 оптуобуһу саҥардары былаанныыбыт. 2022-2024 сылларга биһиэхэ номнуо 124 оптуобус атыылаһыллыбыта, олортон сороҕо ВЭБ.РФ лизинг бырагырааматынан», — диэн бэлиэтээтэ Айсен Николаев.

Өрүттэр ВЭБ.РФ кыттыылаах автопаарканы саҥардыыга уонна Саха сиригэр эбии судаарыстыбаннай өйөбүлү оҥорууга биир тырааныспарга 3 мөл. солк. итэҕэһэ суох харчыны көрөргө сөбүлэстилэр.

Билигин «ГТЛК» АУо-ны уонна ВЭБ.РФ кытары үп-харчы модела  бэлэмнэннэ.
Бырайыак уопсай бүддьүөтэ — 934 мөл. солк., итинтэн 222 мөл. солк. эрэгийиэн үбэ-харчыта (24%), 712 мөл. солк. ВЭБ.РФ үбүлээһинэ.