ПМЭФ – 2025: Саха сирэ уонна СПбГУ бииргэ үлэлиир туһунан дуогабардастылар

Петербурдааҕы экэнэмиичэскэй пуорумҥа Саха сирэ уонна Санкт-Петербурдааҕы судаарыстыбаннай университет (ректор Николай Кропачев) билими, үөрэхтээһини, инновационнай кыаҕы сайыннарар хайысхалаах стратегическай бииргэ үлэлээһиҥҥэ сөбүлэһии түһэристилэр.

Бииргэ үлэлээһин сүрүн хайысхатынан “Хоту сир: туруктаах сайдыы территорията” билим-үөрэх киинин бырайыагар көмөлөһүү, иннин диэки хамсатан иһии, олоххо киллэрии буолар.

“Бииргэ бу киини сайыннарыахпыт, каадырдары бэлэмниэхпит – инженердэртэн экология, креативнай экэниэмикэ исписэлиистэригэр диэри. Билигин университекка 150 оҕо Саха сириттэн үөрэнэр”, — диэтэ Ил Дархан.

Айсен Николаев этэринэн, биир интэриэһинэй бырайыагынан ыраах сытар, суола суох  нэһилиэнньэлээх пууннар оҕолоругар анаан СПбГУ онлайн-оскуоланы үлэлэтиэ. Саха сиригэр хонуу эспэдииссийэтигэр археологтар, палеоэкологтар, геологтар, онтон да атын СПбГУ эдэр чинчийээччилэрэ кэлиэхтэрэ. Олохтоох каадырдары иитэн таһаарыы, саҥа технологиялары үлэҕэ киллэрии – бииргэ үлэлээһин эмиэ биир сүрүн хайысхатынан буолар. Бу туһунан Ил Дархан, бырабыыталыстыба пресс-сулууспата иһитиннэрэр.