«Почти как все» саха киинэтин Арассыыйа 135 киинэ тыйаатырыгар көрдөрүөхтэрэ
![](https://sakha-sire.ru/wp-content/uploads/2023/08/pochti-e1691464295791-900x596.jpg)
Атырдьах ыйын 10 күнүттэн Ларри Яковлев “Почти как все” киинэтэ Арассыыйа быракаатыгар тахсыаҕа. Киинэҕэ сүрүн оруолга блогер, виртуоз-хомусчут Владимир Дормидонтов оонньуур.
Манна даҕатан эттэххэ, киинэ генеральнай продюсера, “Кинологистика” дистрибьютер хампаанньатын салайааччы Анатолий Сергеев Саха сириттэн төрүттээх. Кинини Арассыыйа кинематографистарын ортотугар саха киинэтин Арассыыйа ырыынагар көхтөөхтүк өйөөччү уонна таһаарааччы быһыытынн билинэллэр. Онтон саха көрөөччүтэ Анатолий Сергеевы бэйэтэ устубут “Тропа смерти” уонна “Тропа смерти 2” киинэлэринэн билэллэр.
Иннокентий Ханды сценарийынан уһуллубут “Почти как все” киинэ Саха сиригэр бу сыл кулун тутар 16 күнүттэн көрдөрүллэн, 7,6 мөлүйүөн солкуобайы хомуйбута.
Киинэ режиссера Илларион (Ларри) Яковлев өссө устудьуоннуур сылларыттан маннык киинэни устуон баҕарбыта. Ол туһунан:
“Мин биһигини барыбытын үтүө саналаах, биһигини тулалыыр дьоҥҥо болҕомтолоох буоларга ыҥырыахпын баҕарбытым. Киинэҕэ уһуллубут бары артыыстар: Владимир Дормидонтов, Айаал Винокуров, Ульяна Егорова, Айыына Дьячковская, Дмитрий Юрченко, Айаал Лазарев, Алексей Егоров, Роман Дорофеев, Валентина Чиркова, Владислав Мичурин, Руслан Жалилов, Андрей Слепцов бэйэлэрин дьоруойдарын толору арыйдылар», — диэн этэр.
Киинэҕэ оруоллары киинэ, тыйаатыр биллэр артыыстара Александр Арзин, Денис Беспалый, Марина Гассан, Василиса Зайцева Василиса, Даниил Толстых, Ирина Яковлева нууччалыы саҥартылар.
Сообщить об опечатке
Текст, который будет отправлен нашим редакторам: