Победа хайаттан эмсэҕэлээччилэри ситиһиилээхтик эвакуациялаатылар

От ыйын 23 күнүгэр 18 чаас 58 мүнүүтэҕэ Саха сирин Быыһыыр сулууспатын быыһааччылара Муома улууһугар Победа хайаттан бары эмсэҕэлээччилэри эвакуациялаатылар.

Санатан эттэххэ, от ыйын 22 күнүгэр икки дьахтар хайаттан сууллубуттара. Быһылаан Победа хайатыгар Күөрэтэр диэн перевалга тахсыбыт. Быыһыыр сулууспа көрдүүр-быыһыыр үлэлэрин управлениетын начаалынньыга Батыр Сейдалов кэпсээбитинэн, бөртөлүөт Күөрэтэр перевалын нөҥүө туоруур санаалаах  көтөн кэлбит. Ол эрээри перевалы былыт бүрүйбүт буолан, Обручев мууһугар түһэн, туман ааһарын биир аҥаар чаас кэтээбиттэр. Бу туһунан Саха сиринээҕи Быыһыыр сулууспатын пресс-сулууспата суруйар.

Онтон перевалы нөҥүө көтөн эргийбиттэр. 18:58 чааска 2500 миэтэрэ үрдүккэ  эмсэҕэлээччилэри булбуттар. «Полярные авиалинии» МИ-8 бөртөлүөтүн экипаһын хамандыыра Тимур Арчилович Бесаев бөртөлүөт биир инники көлүөһэтинэн хайа тааһыгар тирэнэн үктэннэрэн, быыһааччылар десаннарын түһэрбит. Быыһааччылар бары эмсэҕэлээччилэри ситиһиилээхтик бөртөлүөккэ киллэрбиттэр. Эвакуациялыыр быыһыыр үлэ хамандыыр үрдүк маастарыстыбатын түмүгэр килбиэннээхтик ааста. Эмсэҕэлээччилэр туруктара үчүгэй, билиҥҥи кэмҥэ кинилэри Дьокуускайга тиэйэн аҕалбыттара.