Подъезд аттыгар умнууга хаалбыт ноутбугу уорбут эр киһи тутулунна

ИДьМ сулууспатын 4 №-дээх полициятын отделын дьуһуурунай чааһыгар эр киһи ноутбуктаах суумкатын биллибэт киһи уоран ылбытын туһунан сайабылыанньа түһэрбит. Хоромньу суумата 80 тыһыынча солкуобай кэриҥэ буолбут. Бу туһунан ИДьМ пресс-сулууспата иһитиннэрэр.

Полиция үлэһиттэрэ ыыппыт суһал-көрдүүр тэрээһиннэрин түмүгэр, уорууга 18 саастаах олохтоох уол сыһыаннааҕын быһаарбыттар. Силиэстийэҕэ быһаарыллыбытынан,  эр киһи массыынатын сылыта туран, ноутбуктаах суумкатын подъезд аттыгар уурбут уонна умнууга хаалларбыт. Ону ыаллыы олорор уол түннүгүнэн көрөн, аллараа түһэн, атын киһи баайын-дуолун уоран ылбыт. Эдэр уол ноутбугу бэйэтигэр хаалларар санаалаах эбит. Бу чахчынан РФ Холуобунай кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Эдэр уол 5 сылга диэри көҥүлэ быһыллыан сөп.