Подъездка утуйа сытар киһиттэн каартатын уорбут…

Дьокуускайга полиция  2 нүөмэрдээх отделын дьуһуурунай чааһыгар куорат олохтооҕуттан сайабылыанньа киирбит.  Кини баанын каартата  сүппүтүн итиэннэ  счетуттан 8000 солк. уорбуттарын туһунан иһитиннэрбит.

Суһал-ирдиир үлэ түмүгэр холуобунай ирдэбил үлэһиттэрэ  уорбаланааччыны ким буоларын билбиттэр. 72 саастаах биэнсийэлээх дьахтар эбит.

Ол курдук эмсэҕэлээччи итирэн кыайан кыбартыыратыгар тиийбэккэ, аара подъезка охтон утуйан хаалбыт.  Ону саастаах дьахтар утуйа сытар киһи хармааныттан  түспүт баанын каартатын ылбыт. Ол кэнниттэн уоруллубут каартанан маҕаһыыҥҥа туһанан, ону-маны атыыласпыт. Билигин дьахтарга РФ Холуобунай Кодексын  158 ыст. 3 чааһынан холуобунай дьыала көбүтүллүбүт диэн Ис дьыала министиэристибэтин пресс-сулууспата иһитиннэрдэ.