Подъезка дьахтарга саба түстүлэр

ИДьМ Дьокуускайдааҕы 2 №-дээх полиция салаатыгар аҕам саастаах дьахтар үҥсүү түһэрбит. Кини дьиэтигэр киирэн истэҕинэ, подъезка билбэт киһитэ батыһан киирбит. Дьахтартан төлөпүөнүн былдьаабыт уонна таһырдьа куоппут.

Холуобунай ирдэбил үлэһиттэрэ суһаллык көрдөөн саба түспүт киһини туппуттар. Уорбаланааччы 47 саастаах хаста да сууттана сылдьыбыт, ускул-тэскил сылдьар киһи эбит. Кини дьахтары бородуукта атыылыыр маҕаһыыҥҥа бэлиэтии көрбүт уонна биллибэтинэн батыһан кэлбит.

Уорбут төлөпүөнүн ломбардка туттарбыт уонна ол харчытынан арыгылаабыт. Арассыыйа Федерациятын холуобунай кодексын 161 ыст 2 ч. «Грабеж» диэн холуобунай дьыала тэриллибит. Уорбаланааччыны силиэстийэлиир изоляторга хаайбыттарын туһунан СӨ ИДьМ пресс-сулууспата иһитиннэрэр.