Полицейскайдар биэнсийэлээх харчытын уорбут 18 саастаах уолу туттулар

Быйыл кулун тутар ыйга полицияҕа Дьокуускай куорат 77 саастаах олохтооҕо түөкүттэр сиэртибэлэрэ буолбутун уонна мөлүйүөн солк. аҥарын харчытын сүтэрбитин туһунан тыллаабыт.

Полицейскайдар аан дойдутааҕы кибер-халабырдьыттарга кыттыгастаах 18 саастаах уолу туттулар. Бу туһунан Саха сиринээҕи ИДьМ пресс-сулууспата иһитиннэрэр.

Саастаах эр киһи «быраабы араҥаччылыыр уорганнар үлэһиттэрэ» буолан кубулуммут түөкүттэргэ киирэн биэрбит. «Түөкүннээһин» ыстатыйаҕа олоҕуран холуобунай дьыала тэрилиннэ.

Саха сирин киберполицейскайдара көрдүүр тэрээһиннэри ыытан, 18 саастаах буруйу оҥорууга кыттыгастаах уолу туппуттар. Уорбаланааччыны Москваҕа булбуттар.

Доппуруос кэмигэр эдэр киһи хара дьайыыларыгар билиммит. Саха сирин олохтооҕуттан уорбут харчыны «үлэ биэрээччилэргэ» криптобменник нөҥүө ыыппыта быһаарылынна.

Уорбаланааччы тутуллубутун кэннэ, Дьокуускай куоракка силиэстийэлээччигэ аҕалыллыбыт.