Полицейскайдар эр киһини быыһаатылар

Ис дьыала министиэристибэтин пресс-сулууспата иһитиннэрбитинэн,  чааһынай дьиэҕэ баһаар тахсыбытыгар полицейскайдар ким хайа иннинэ бастакы тиийэн, эр киһини быыһаабыттар.

Ньурба улууһун ДПС  старшай инспектора, полиция   старшай лейтенана Александр Кириллин уонна инспектор, полиция  старшината  Николай Петров Ньурба куоракка биир чааһынай дьиэ умайан эрэрин көрбүттэр. Тута дьуһуурунай чааска уонна баһаарынай сулууспаҕа биллэрбиттэр уонна  баһаар тахсыбыт  дьиэтигэр  айаннаабыттар.

Баһаарынайдар кэлэллэрин кэтэспэккэ, умайа турар дьиэҕэ киирбиттэр. Онно номнуо таҥаһын уокка сиэтэн эрэр эр киһини быыһаабыттар. Итиэннэ эр киһиэхэ бастакы көмөнү оҥорбуттар. Бу кэннэ суһал көмө миэдиктэрэ кэлэн, илиитин, сирэйин, атаҕын тилэхтэрин уокка сиэппит киһини госпитализациялаабыттар.