Полицейскайдар оҕолорго Саҥа дьыллааҕы ураты бырааһынньыгы бэлэхтээтилэр

Амма улууһун ИДьМ отделениетын үлэһиттэрэ үгэс быһыытынан «Полицейский Дед Мороз» диэн Бүтүн Арассыыйатааҕы аахсыйаҕа кыттыстылар.

Улуустааҕы тэрээһини Саастарын ситэ илик оҕолор дьыалаларыгар уонна кинилэр бырааптарын көмүскүүр хамыыһыйа, Нэһилиэнньэни социальнай көмүскэл киэҥ хабааннаах киинин дьиэ кэргэҥҥэ уонна оҕоҕо социальнай көмөҕө отделениета уонна Амма улууһун ИДьМ отделениета ыыттылар. Быйыл күүстэрин холбоон, олох ыарахан балаһыанньатыгар түбэспит дьиэ кэргэттэр 69 оҕотугар минньигэс Саҥа дьыллааҕы бэлэхтэринэн үөртүлэр.

Полицейскай Тымныы оҕонньоро уонна Хаарчаана оҕолорго дьиҥнээх соһуччу бэлэх оҥордулар. Алыптаах дьоруойдар оҕолорго Саҥа дьылга бары кэрэни, үтүөнү баҕардылар уонна кинилэргэ минньигэһи туттардылар. Амма улууһун эдэр олохтоохторо ыалдьыттарга олус үөрэн, махтанан хоһоон аахтылар. «Полицейский Дед Мороз» аахсыйа чэрчитинэн ыытыллыбыт тэрээһин ИДьМ иһинэн Уопсастыбаннай Сэбиэт өйөбүлүнэн буолан ааста, диэн СӨ ИДьМ пресс-сулууспата суруйар.