Полицейскайдар ыалы баһаартан быыһаатылар

Биир сарсыарда Ис дьыала министиэристибэтин профессиональнай бэлэмнээһиҥҥэ киинин истээччилэрэ, Уус Алданнааҕы  полиция отделын сержана   Дмитрий Копырин уонна младшай сержант   Георгий Винокуров түүҥҥү эриэйдэттэн кэлэн иһэн, Өктөөп  50 сыла автострадаҕа чааһынай дьиэлэр тастарыгар буруо тахсарын бэлиэтии көрбүттэр.

Буруо тахсар сиригэр тиийбиттэрэ, хаһаайыстыбаннай тутуу умайа турар эбит. Уот олорор дьиэҕэ чугаһаабыт. Онон тута полицейскайдар дьиэлээхтэргэ тоҥсуйан уһугуннартаабыттар. Аҕам саастаах дьахтардаах эр киһини куттала суох сиргэ илдьибиттэр.

Баһаар туһунан баһаарынайдарга тыллаабыттар.  Итиэннэ  Дмитрий Копырин уонна Георгий Винокуров уоту утары охсуһууга бэйэлэрэ туруммуттар. Тиэргэн аанын аһан, анал тиэхиньикэ киирэригэр бэлэмнээбиттэр уонна буочукаттан ууну  таспыттар.

Баһаарынайдар кэлэн уоту умуруорбуттар.

Ведерниковтар дьиэ кэргэн полиция үлэһиттэригэр көмөлөрүн иһин  социальнай ситим нөҥүө махталларын тириэртилэр.

@mvd_sakha