Полиция хапытаана Евгений Ачикасов маастарыстыбаны көрдөрүү куонкуруһугар 8 миэстэни ылла

СӨ ИДьМ Дьокуускайдааҕы полициятын патрульнай-постовой сулууспатын туспа батальонун взводун хамандыыра полиция хапытаана Евгений Ачикасов РФ ИДьМ территориальнай уорганнарын патрульнай-постовой сулууспаларын хамандыырдарын ортолоругар Бүтүн Арассыыйатааҕы профессиональнай маастарыстыбалары көрдөрүү куонкуруһугар 8 миэстэни ылла.

Тэрээһиҥҥэ дойду бары муннуктарыттан уопсайа 102 киһи, патрульнай-постовой сулууспа полкаларын, батальоннарын, роталарын уонна взводтарын хамандыырдара кытыннылар диэн ИДьМ Саха сиринээҕи салалтатын пресс-сулууспата иһитиннэрэр. Куонкурус Москваҕа РФ ИДьМ Бүтүн Арассыыйатааҕы идэни үрдэтэр институтун былаһааккатыгар ыытылынна.

Түөрт күн устата кыттааччылар профессиональнай үөрүйэхтэрин: быраап, сулууспа, бойобуой уонна эт-хаан өттүнэн бэлэмнэрин көрдөрдүлэр. Кыттааччылар түөрт түһүмэххэ баалларынан куонкурус кыайыылаахтара уонна призердара быһаарылыннылар.

Евгений Ачикасов бойобуой уонна эт-хаан өттүнэн бэлэмнэнии дьиссипилиинэтигэр үрдүк көрдөрүүнү ситиһэн уопсай зачекка 3 миэстэ буолла. Инньэ гынан  бары түһүмэхтэр түмүктэринэн полиция хапытаана Бүтүн Арассыыйатааҕы профессиональнай маастарыстыбалар куонкурустарыгар 8 миэстэни ылла.

.