Полиция сэрэтэр: түөкүттэр социальнай ситимнэри алдьаталлар!

Түөкүттэр киэҥник биллэр социальнай ситимнэр аккауннарын алдьатаннар дьону албыннаан угаайыга киллэрэллэр диэн ИДьМ пресс-сулууспата иһитиннэрэр.

Ол курдук, Дьокуускай олохтооҕун социальнай ситимигэр бииргэ үлэлиир киһититтэн сурук кэлбит. Онно кини ыксал буолбутунан, аҕыйах чааһынан төннөрөргө диэн, 25 000 солк. көрдөөбүт. Бу түгэҥҥэ эмсэҕэлээччи дьахтар бииргэ үлэлиир киһитигэр төлөпүөннүүр кыаҕа суох буолан, баан мобильнай сыһыарыытын нөҥүө ыйыллыбыт сууманы тута ыыппыт.

Кэлин биллибитинэн, бииргэ үлэлиир киһитин аккаунун алдьатан түөкүттэр кини аатыттан суруйалларын туһунан статуһугар сэрэппит эбит. Ол эрээри түөкүттэр кини статуһун атын дьон көрбөтүн курдук оҥорон, сурук төлөпүөн хаһаайыныгар эрэ көстөр эбит. Ону таһынан, бу киһи аймаҕа төлөпүөннүү сатаан баран, кыайан тиийбэккэ ханна баарын ыйытан суруйбут, онуоха түөкүттэр кини аатыттан стоматология кэбиниэтин хаартыскатын уонна «Кэпсэтэр кыаҕым суох» диэн шаблон-суругу ыыппыттар.

Онон ИДьМ үлэһиттэрэ өссө төгүл сэрэтэллэр! Харчыны ыытыах иннинэ, счет дьиҥнээх хаһаайынын кытта сибээстэһиҥ, эрийэн билсиҥ, көрдөһүү билэр киһигиттэн кэлбитин бэрэбиэркэлээҥ диэн санаталлар.