Хаартыска: Саха сиринээҕи ИДьМ пресс-сулууспата.
Алданнааҕы ИДьМ отделениетын үлэһиттэрэ массыыналары уорар уонна күрэтэр Алдан куорат эдэр олохтооҕун туттулар.
Бу иннинэ полиция дьуһуурунай чааһыгар Спеков уулуссатынааҕы дьиэ таһыгар турбут “Тойота-Ист” массыына сүппүтүн туһунан иһитиннэрии киирбитэ. Хас да чаас буолан баран, уоруллубут иномарканы ДПС үлэһиттэрэ “Лена” федеральнай суол 643 км сүүрдэ сылдьалларын көрбүттэрэ.
Суоппарга тохтоо диэн бэлиэ биэрбиттэрин үрдүнэн, истибэккэ, өссө түргэтээбитэ. Оччотугар бэрээдэги араҥаччылааччылар кэнниттэн эккирэппиттэрэ. Эккирэтииттэн куота сатаан, бэрээдэги кэһээччи хас да кутталлаах маневры оҥорбута – суол кытыытыгар да, утары иһэр массыына суолугар да ойон тахсыталаан, дьон олоҕор кутталы үөскэппитэ.
Массыынаны тохтотор туһугар иниспиэктэрдэр таабылынай сэби-сэбиргэли туттарга күһэллибиттэрэ. Полиция үлэһиттэрэ суоппары сэрэтэн бастаан салгыҥҥа ыппыттара, оттон көлүөһэлэри ыппыттара. Сотору буолан баран, массыына “Солнечнай” микро-оройуон муостатыгар тохтообута.
Массыына иһигэр түөрт сокуоннай саастарын ситэ илик оҕолор олороллоро, суоппардара 17-лээх уол массыынаны ыытар бырааба да суоҕа. Автоиниспиэктэрдэр кинини уруккуттан да полиция үлэһиттэрин хараҕын далыгар баарын булан ылбыттара. 2024 сыл бэс ыйыгар эмиэ маннык буруйу оҥорон, 1 сылга усулуобунайдык көҥүлүн быһыыга уураахтаммыт эбит. Ол саҕана ПДД түөртэ кэспитин иһин эдэр киһи административнай эппиэтинэскэ тардыллыбыт.
Ол эрээри уол күттүөннээх түмүгү оҥостубатах итиэннэ буруйу кэспитин курдук кэһэ сылдьыбыт. Бэйэтэ этэринэн, хатамматах массыыналары күрэтэн, наадалаах сиригэр тиийэр эбэтэр доҕотторун кытта хатааһылыыллар эбит. Билиҥҥи туругунан, 2024 сыл от ыйыттан балаҕан ыйын киллэрэн туран, буруйу кэһээччи биэс массыынаны күрэтиигэ уорбаланар.
Маны таһынан бэрээдэги араҥаччылааччылар уолу массыыналар истэриттэн түөрт мал уоруллуутугар кыттыгастааҕын булан таһаардылар. Уоруллубут мал ахсааныгар 100 тыһ. солк. уонна 42 тыһ. солк. итиэннэ уопсайа 60 тыһ. солкуобайдаах портативнай холуоҥка уонна бэлэсипиэт киирдилэр.
РФ Холуобунай кодексатын 166 ыст. 1 ч. уонна 158 ыст. 2 ч. холуобунай дьыалалар тэрилиннилэр. Буруйдааҕы хаайар миэрэ ылылынна. Уоруллубут массыыналар сокуоннай бас билээччилэригэр төннөрүлүннүлэр. Холуобунай дьыаланы силиэстийэлээһин салҕанар, диэн иһитиннэрэр Саха сиринээҕи ИДьМ пресс-сулууспата.
Саҥа дьыл барахсан, оннук-маннык итэҕэллэргэ, кирдээх бэлиитикэҕэ умньамматах, соҕотох алыптаах, оҕотуттан оҕонньоругар тиийэ дуоһуйа, астына…
Саха сирэ хорсун-хоодуот дьонунан аатырар, дойду устуоруйатыгар элбэх дьоруойу бэлэхтээбитэ, олор истэригэр Аҕа дойду Улуу…
Ааспыт сууккаҕа Саха сиригэр буруйу оҥоруу сэттэ түбэлтэтэ тахсыбыт. Манан процессуальнай бэрэбиэркэни ыытыыны уонна холуобунай…
«Якутскэнерго» ПАУо өрөспүүбүлүкэ олоҕо-дьаһаҕа бигэ туруктаах буолуутугар уотунан-сылааһынан хааччыйар дьоһун суолталаах тэрилтэнэн буолар. Хампаанньа генеральнай…
Бүгүн, тохсунньу 11 күнүгэр, өрөспүүбүлүкэ соҕуруулуу-арҕаа, хотугулуу-илин, илин өттүгэр кыралаан хаардыаҕа. Киин, арҕаа оройуоннарга туманнаах…
Бүгүҥҥү күн – наҕыл, сымнаҕас уонна дьиэҕэ-уокка чугас дьону кытта сынньанарга табыгастаах кэм. Ый Оҕус…