Полиция үлэһиттэрэ Дьокуускайга ууга түспүт дьахтары быыһаатылар

Бүгүн Дьокуускай куорат 202 микрооройуонугар СӨ ИДьМ Патрульнай-постовой сулууспатын үлэһиттэрэ, ыстаарсай сержаннар Сергей Алаганчаков уонна Данил Семенов уопсастыбаннай бэрээдэги көрө сылдьаннар көмө көрдүүр хаһыыны истибиттэр.

Хаһыы иһиллэр сиригэр тиийэннэр, Өлүөнэ өрүс боротуохатыгар, сөтүөлээһин көҥүллэммэт сиригэр, дьахтар сүүрүккэ оҕустаран, ууга булумахтана сылдьарын көрбүттэр. Дьахтар сэниэтэ эстэн, төбөтө нэһиилэ сүтэ-сүтэ көстөр буолбут.

Бу туһунан СӨ ИДьМ пресс-сулууспата иһитиннэрэр.

Данил Семенов форматын устаат, бастакынан ууга ыстаммыт. Кини тимирэн эрэр дьахтарга харбаан тиийэн, кытылга соһон таһаарбыт. Дьахтар полицияларга быыһаабыттарын иһин махтаммыт, ол эрээри медиктэргэ көрдөрөртөн аккаастаммыт.