Полициялар Дьокуускай киинигэр охсуһууга кыттыгастаах үс буруйданааччыны туттулар

Дьокуускайдааҕы полиция отделыгар киин куорат Киров аатынан уулуссаҕа охсуһуу кэнниттэн 20- тэн 24-гэр диэри саастаах үс олохтоох эдэр ыччаты тутан аҕаллылар.

Бу туһунан атырдьах ыйын 9 күнүгэр ИДьМ пресс-сулууспатыгар иһитиннэрдилэр. Эдэр дьон Дьокуускай куорат үөрэх тэрилтэлэрин устудьуоннара буолаллара быһаарылынна. Кинилэр полиция отделыгар быһаарыы биэриэхтэрэ. Бу иннинэ Дьокуускай киинигэр маассабай охсуһуу видеота социальнай ситимнэргэ тарҕаммыта. Видеоҕа көрдөххө, маассабай охсуһууга икки эдэр дьон бөлөхтөрө бэйэ-бэйэлэригэр саба түһэллэр.

Барыллаан силиэстийэ быһаарыытынан, охсуһуу  иирсээнэ Кирова аатынан уулуссаҕа бар-ресторан таһыгар саҕаламмыт. Ол түмүгэр, эт-сиин өттүнэн икки киһи эчэйиини ылбыт, биирдэстэрин видеону көрөн быһаарыыларынан битаҕа майгынныыр маһынан охсоллор. Ол эрээри, мэдиссиинэ тэрилтэтигэр ким да тиийбэтэх. Буолбут чахчынан бэрэбиэркэ салҕанар.