Хаартыска: Саргын Скрябин, ЯСИА
Атырдьах ыйын 8 күнүгэр Маҕан аэропордугар икки саҥа Ми-8МТВ-1 бөртөлүөтү билиһиннэрдилэр.
Салгын суудуналара «Полярные авиалинии» авиахампаанньа пааркатын толордулар. Мантан биирдэстэригэр эрэгийиэн авиацията тэриллиитин уонна сайдыытын үйэлээх үбүлүөйүн чиэһигэр «Саха сирин авиациятын 100 сыла» диэн ааты сүктэрдилэр, — диэн өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрэр.
Дьаһалга СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников, Тырааныспар уонна суол хаһаайыстыбатын миниистирэ Владимир Сивцев, Росавиация олохтоох управлениетын салайааччыта Олег Ворошилов, Дьокуускайдааҕы уонна Өлүөнэтээҕи архиепископ Роман, ону таһынан атын федеральнай уонна эрэгийиэннээҕи структуралар бэрэстэбиитэллэрэ кытыннылар. Дмитрий Садовников салгын флотун саҥардыы – Ил Дархан Айсен Николаев туруорбут стратегическай соруга буоларын бэлиэтээтэ.
«Бу массыыналар биһиги кыахтарбытын быдан кэҥэтиэхтэрэ: дьону уонна таһаҕаһы таһыахтара, ыксаллаах быһыыга-майгыга түргэнник хардарар, ойуур баһаардарын умуруорууга кыттар уонна ыраах арктическай улуустары кытта олоххо суолталаах сибээһи хааччыйыахтара.
„Саха сирин авиациятын 100 сыла“ диэн ааты сүкпүт бөртөлүөт ураты киэн туттууну үөскэтэр. Маннык гынан, биһиги 1920-с сыллартан хотугу халлаан тыйыс киэлитин баһылаабыт авиатордар бары көлүөнэлэригэр ытыктабылбытын биэрэбит», — диэн бастакы солбуйааччы бэлиэтээтэ.
«Полярные авиалинии» генеральнай дириэктэрэ Семен Винокуров өрөспүүбүлүкэ баһылыгар уонна бырабыыталыстыбатыгар, ону таһынан стратегическай партнердарыгар — Казаннааҕы бөртөлүөт собуотугар, «Вертолеты России» холдиҥҥа уонна Судаарыстыбаннай транспортнай лизинг хампаанньатыгар өйөбүллэрин иһин махтанна.
«Ону таһынан, Казаннааҕы бөртөлүөт собуотуттан Маҕаҥҥа диэри бөртөлүөттэри 30 чаастаах уустук көһөрөн аҕалыыны толорбут, эдэр хамандыырдар Сергей Дурнов уонна Павел Аммосов салайааччылаах биһиги экипажтарбытыгар махтанным. Барыгытын бу бэлиэ түгэнинэн эҕэрдэлиэхпин, Саха сирин авиацията сайдарын туһугар ситиһиилэри уонна чэчирии сайдыыны баҕарыахпын баҕарабын», — диэн Винокуров эбэн эттэ.
Бөртөлүөттэри официальнайдык туттарыы от ыйын 29 күнүгэр Казаннааҕы бөртөлүөт собуотугар буолбута. Дьаһалга Татарстан баһылыга Рустам Минниханов, СТЛХ, «Вертолеты России» холдинг уонна собуот бэйэтин салайааччылара кыттыбыттара. Салгын суудуналара СТЛХ-ны кытта 15 сыллаах лизинг сөбүлэҥин чэрчитинэн атыылаһыллыбыттар.
Уус Алдан улууһун дьаһалтата, тэрилтэ салайааччылара байыаннай дьайыы кыттыылаахтарын, төрөппүттэрин, дьиэ кэргэттэрин кытта көрсүбүттэр. …
Ааспыт өрөбүллэргэ Дьокуускай куоракка 7 суол быһылаана тахсан, 3 киһи араас эчэйиини ылбытын туһунан Госавтоиниспиэксийэ…
Сунтаар улууһугар ааспыт сылга норуот ырыаһыта, олоҥхоһут, сыанаҕа үҥкүү култууратын төрүттээччи Сергей Зверев-Кыыл Уола төрөөбүтэ…
Дьокуускай куоракка биир эр киһи атын киһи каартатын булан баран, туһана сылдьыбытын полицейскайдар туттулар. Бу…
Дьокуускайдааҕы национальнай гимназия үөрэнээччилэрэ аан дойду таһымыгар кыайыыны ситистилэр. А.Г. уонна Н.К. Чиряевтар ааттарынан Дьокуускай…
Кириһиэнньэ сөтүөтүн кэмигэр дьоҥҥо куттал суох буолуутун 630-тан тахса киһи уонна 140 тиэхиньикэ хааччыйда. Онно…