“Полярные авиалинии” бөртөлүөттэрэ Өлүөхүмэ улууһун ууга барбыт сэлиэнньэтин дьонун көһөрөллөр

Халаан уутунан сибээстээн Өлүөхүмэ улууһугар ыксаллаах быһыы-майгы эрэсиимэ биллэриллибитэ. Бырабыыталыстыба бэрэссэдээтэлин бастакы солбуйааччы Дмитрий Садовников сорудаҕынан, улууска “Полярные авиалинии” икки Ми-8 бөртөлүөтүн ыыппыттара.  

Билиҥҥитэ авиахампаанньа экипааһа быыһааччылары кытта ууга барбыт Кыыллаах сэлиэнньэтиттэн нэһилиэнньэни, сүрүннээн саастаах дьону, оҕолору уонна ыарыһахтары быстах пууҥҥа Даппарайга көһөрөллөр.

Өссө биир бөртөлүөт муус харыытын эһэр үлэҕэ сыһыарыллыаҕа. Бу туһунан “Полярные авиалинии” хампаанньа пресс-сулууспата иһитиннэрэр.

Барыта 27 киһини, ол иһигэр 5 оҕону туораппыттар диэн  Дмитрий Садовников телеграм-ханаалыгар биллэрэр.