Поповтар оҕолорун үлэҕэ үөрэтэллэр

Мэҥэ Хаҥалас улууһун Өлөчөй нэһилиэгэр олорор Саргылана, Вячеслав Поповтар бэйэлэрин кыахтарынан сүөһү иитэн, оҕолорун кыра эрдэхтэриттэн үлэни, үөрэҕи тэҥҥэ дьүөрэлээн ииттилэр. Кинилэр биэс оҕолоохтор. Саргылаана оҥо уһуйаанын үлэһитэ. Нэһилиэккэ ыытыллар тэрээһиннэргэ куруук кыттар. 2025 с. “Сыл көхтөөх ийэтэ” диэн номинацияны ылбыта.

Вячеслав “Алтан нэһилиэгэ” СП үлэһитэ. Аҕа киһи быһыытынан уолаттарыгар холобур буолар. Уолаттарын от-мас үлэтигэр, муҥхаҕа илдьэ сылдьан үөрэтэр. Кыыстара Вера Төҥүлү орто оскуолатын мэдиссиинискэй кылааһын үчүгэйдик бүтэрэн, Хабаровскайдааҕы мэдиссиинэ кэллиэһигэр үөрэнэр.

Эрэли аҕата кыра эрдэҕиттэн тиэхиньикэҕэ сыһыарбыта. Сайын улуустааҕы “Сайдыс” лааҕырга сылдьан “Бастыҥ актыбыыс” аатын ылбыта. Спира убайытан хаалсыбат. Кинилэр нэдиэлэ аайы Аллара Бэстээххэ бассейҥҥа баран эрчиллэн кэлэллэр. Төрөппүттэригэр өрүү күүс-көмө буолаллар.

Оттон икки кыра Степа, Слава дьиэ ис-тас үлэтигэр көмөлөрө баһаам. Степа иккис кылааска үөрэнэр. Чыычаахтар эҥин туһунан өрүү хасыһан ааҕар. Дьиэтин таһыгар чыычаахтарга аҕатыныын уйа тутан, чыычаахтары аһатар, кэтээн көрөр. Оттон Слава  —маҥнайгы кылаас үөрэнээччитэ. Кыра эрдэҕиттэн араас сценкаларга оонньуур, монолог ааҕар. Быйыл “Кылаан кыайыылаах” ааты ылбыта. Научнай-практическай кэмпириэнсийэҕэ хос эбээтин, эһээтин олохторун туһунан кэпсээн биһирэммитэ.

Оскуолалара 80 сылынан үтүө дьыала аахсыйатыгар кыттыһан, Поповтар дьиэ кэргэн оскуола успуорт саалатын ис өттүн оҕолорунуун кырааскалаатылар. Бу курдук Поповтар оҕолорун дьиэ ис-тас үлэтигэр сыһыаралар, үөрэҕи тэҥҥэ тутан сылдьалларыгар үөрэтэллэр.

Вера Владимирова, Дьокуускай.