#ПозывнойКультура: Эрхаан байыаннай дьайыы зонатыгар кэнсиэртээтэ

Ю.Е. Платонов аатынан судаарыстыбаннай эстрада тыйаатырын артыыһа, биллэр артыыс Аркадий Николаев — Эрхаан  бу күннэргэ анал байыаннай дьайыы зонатыгар 14 кэнсиэри ыытта.

Эрхаан аптаарскай ырыаларын Запорожскай уобалас, ДНӨ уонна ЛНӨ территорияларыгар көмүскүүр Саха сириттэн байыастарга анаан толордо. Улахан кэнсиэр «Боотур» БАРС-2 этэрээтигэр эмиэ ыытылынна диэн тэрийээччилэр иһитиннэрдилэр.

Бойобуой сорудаҕы толоруу кэнниттэн артыыс «Боотур» этэрээт байыастарыгар төрөөбүт дойдуларын, дьиэлэрин, оҕо саастарын санатар уонна патриотизм туһунан ырыаларын толордо. Сорох ырыаларын артыыс 2022 сыллаахха көҥүл өттүнэн байыаннай дьайыыга сулууспалыыр уолугар анаата. Кэнсиэр бырагырааматын түмүгэр Аҕа дойду көмүскээччилэригэр аналлаах ырыа иһилиннэ.

«Эрхаан кэнсиэрэ уйулҕабытын көтөҕөр уонна биһиги бойобуой тыыммытын өссө бөҕөргөтөр», — диэн байыастар санааларын үллэһиннилэр. «Бу сырыыга маршрут уһуна түөрт тыһыынчаттан тахса километр буолла. Фроҥҥа уолбун кытта алтыс төгүлүн көрүстүм. Мин аҕа буоларбынан уолбунан уонна дойду көмүскэлигэр туруммут Саха сирин бары уолаттарынан киэн туттабын», — диэн Аркадий Николаев санаатын үллэһиннэ.

Эрхаан волонтер улэтигэр көхтөөхтүк кыттар, гуманитарнай көмөнү оҥорорго көмөлөһөр. Кини байыаннай дьайыы зонатыгар мэлдьи айанныыр, госпиталларга тиийэн кэнсиэртиир, патриотическай айымньыларынан уонна талааннаах айар-үлэтинэн бары байыастары өйүүр.