#ПозывнойКультура: Хордар кэлэктииптэрин «Сила в единстве! аахсыйа түмүөҕэ

Дьокуускай куорат «Триумф» успуорт уораҕайыгар олунньу 25 күнүгэр «Сила в единстве!» норуот аахсыйатын чэрчитинэн Бүтүн Арассыыйатааҕы хордар куонкурс-бэстибээл эрэгийиэннээҕи түһүмэҕэ буолар гала-кэнсиэр ыытыллар.

Тэрийээччилэр этэллэринэн, тэрээһин көннөрү култуурунай түгэн эрэ буолбакка, хордар ускуустубатын тыыннаах хаалларыыга, патриотизм уонна биир сомоҕо буолууну бөҕөргөтүүгэ туһуланар.

Аахсыйа чэрчитинэн Саха сиригэр хордар ускуустубатын сайдыытыгар сүҥкэн кылааты киллэрбит Феврония Алексеевна Баишева уонна Семен Гаврильевич Васильев ааттарыгар ураты болҕомто ууруллар.

Кэнсиэркэ Аҕа дойду Улуу сэриитин Кыайыытыгар уонна хорсун быһыыларыгар аналлаах айымньыны толорор өрөспүүбүлүкэ бастыҥ хордар кэлэктииптэрэ кыттыыны ылыахтара.

Ону сэргэ Опера уонна балет тыйаатырын солистара Александр Емельянов, Григорий Петров, Екатерина Захарова, Петр Бучугасов эмиэ кыттыахтара.

Бырагыраамаҕа С.А. Зверев-Кындыл аатынан үҥкүү национальнай тыйаатырын артыыстара, Саха сирин үҥкүү успуордун Сойууһа, «Кыайыы вальса» бэстибээл кыттыылаахтара, Дьокуускайдааҕы үҥкүү кэлэктииптэрэ кытталлара эбиилик буолуоҕа. Аахсыйа араас саастаах дьону, идэни уонна интэриэһи түмэр. Кэлэктиптэр ортолоругар «Боевые шелкопряды Якутии» уопсастыбаннай хамсааһын хора кыттыыны ылар.

Социальнай ситимнэргэ быһа көрдөрүүлэр тэриллиэхтэрэ. Онон ким баҕааах бырааһынньыкка атын сиртэн тутулуга суох кыттыһыан сөп. Кэнсиэркэ билиэттэн хомуллубут үп-харчы барыта анал байыаннай дьайыыны өйөөһүҥҥэ ыытылыаҕа.

Аахсыйа чэрчитинэн национальнай үнүстүрүөмүөннэри, үгэс буолбут сахалыы быһахтары атыылааһын уонна норуот маастардарын оҥоһуктарын быыстапката ыытыллыаҕа. Маны таһынан кыайыылаахтарга бириис буолар ураты статуэтканы билиһиннэриэхтэрэ.