Пресс-кэмпириэнсийэ: оҕо аһылыга, сымыыт, каадыр тиийбэтэ, Өлүөнэ күргэтэ

Бүгүн, ахсынньы 25 күнүгэр, Ил Дархан Айсен Николаев П.Н. уонна Н.Е. Самсоновтар ааттарынан Хатас орто оскуолатын саҥа куорпуһун бибилэтиэкэтин саалатыгар үгэскэ кубулуйбут улахан пресс-кэмпириэнсийэтин оҥордо.

Икки чаастан ордук барбыт пресс-кэмпириэнсийэҕэ Ил Дархан суруналыыстар байыаннай дьайыы кыттыылаахтарыгар өйөбүл дьаһалларын, оскуолалары уонна уһуйааннары, аэропорт вокзалларын, сөмөлүөт түһэр-тахсар былаһааккаларын тутуу, ыччаты патриоттуу иитии, табыгастаах куорат эйгэтин уонна сири-уоту тупсарыы, гаас уматыгын, саха тылын сайыннарыы, мэдиссиинэ эйгэтигэр каадыр тиийбэтин кыһалҕатын, бырамыысыланнас сайдыытын, оннооҕор сымыыт туһунан ыйытыыларыгар хоруйдаата.

Ил Дархан Айсен Николаев биллэрбит Оҕо саас сылыгар өрөспүүбүлүкэҕэ үөрэхтээһин уонна иитии тиһигин сайыннарыы сүрүн хайысхаларын бэлиэтээтэ. Онуоха кэнники сылларга оскуолалары уонна уһуйааннары тутуу төһүү буолуохтааҕын эттэ.

Суруналыыстар дьадайыыны утары дьаһаллар, хамнас орто кээмэйэ күттүөнэ суох үрдүүрэ, эппиккэ диэри, ким эрэ хаппыыстаны, ким эрэ эти сиирин, ол эрээри уопсай көрдөрүүгэ бары «голубцы сиирбит» курдук көстөрүн, хамнас чопчу хаһан, хайдах үрдүөҕүн ыйыттылар.

Өссө биир ыйытыынан, Өлүөнэ күргэтин тутуу хаһан саҕаланара диэн буолла. Ил Дархан Анал этиитигэр эппитин курдук, кэлэр 2024 сыл саҥатыттан Өлүөнэ күргэтин тутуу саҕаланара былааннанар.

Арҕаа дойдулар сааҥсыйаларынан сибээстээн тастан киириини солбуйар оҥорон таһаарыы туһунан эмиэ таарылынна.

Дьаамсыктар олохторун үйэтитиигэ биллэриллибит биэс сыллаах үлэ хайдах барыахтааҕын, бу хайысхаҕа туризмы сайыннарыы сүрүннээн барыахтааҕын Айсен Николаев тоһоҕолоон бэлиэтээтэ.

Түөкүттэр нэһилиэнньэ кыаммат араҥатын, учууталлары, устудьуоннары буулаан, бэйэлэрэ да кыра харчылаах дьону албынныыллара элбээбитин, онон сиэттэрэн оскуола оҕолоругар үп-харчы боппуруоһугар уруоктары ыытыы наадатын кытары эттилэр.

Суруналыыстар орто анал үөрэх устудьуоннарын истипиэндьийэтэ, эдэр исписэлиис хамнаһа олус кырата, ол тыа сирдэригэр каадыр тиийбэт буолуутугар тириэрдэр диэн эттилэр.
Онуоха Ил Дархан Анал этиитигэр эдэр исписэлиистэри өйүүр чопчу дьаһаллары ылыммытын, соруктары туруорбутун эттэ.

Саха сирин баалабай бородууктата үүнүүтүн туһунан эмиэ ыйыттылар. Ил Дархан быйылгы сыл түмүгүнэн 2022 с. курдук да буолбатар, үрдээһин баарын эттэ. Саха сирэ Уһук Илин эрэгийиэҥҥэ бастыҥнартан биирдэстэрэ буоларын, биир тэтиминэн сайдан, таһымын тутан иһэрэ этилиннэ.

Тиһэх боппуруоһунан Онкология киинэ хаһан ситэн үлэҕэ киирэрий диэн буолла. Кырдьык, бу кэтэһиилээх кииммит атахтанан, силигэ сиппэккэ турар. Айсен Николаев эппитинэн, билиҥҥитэ аныгы оборудованиены толору таҥан киллэрии кыаллыбакка, ону таһынан арҕаа дойдулар сааҥсыйаларынан Арассыыйа сиригэр-уотугар киирбит эрээри, Саха сиригэр кэлэллэригэр сорох оборудованиеларга оҥоһуллубут сирдэриттэн көҥүл бэриллибэккэ бытаарыы барбытын эттэ.

Ил Дархан үгэс буолбут сылы түмүктүүр улахан пресс-кэмпириэнсийэтэ суруналыыстары кытары уопсай хаартыскаҕа түһүүнэн түмүктэннэ.