Пригород сэлиэнньэтигэр Дьахталлар түмсүүлэрэ көхтөөхтүк үлэлиир

Бу түмсүү 2022 сылаахха Пригород дьаһалтатын исписэлииһэ Лена Флегонтова көҕүлээһининэн тэриллибитэ. Салайааччынан Чэмэлиинэ Скрябина талыллыбыта.

Онтон ыла Пригород дьаһалтатын, Дьокуускай куорат Дууматын дьокутаата Иван Салатюк, Аҕалар сүбэлэрин бэрэссэдээтэлэ Ньургун Тихонов, «Надежда» култуура дьиэтин дириэктэрэ Эльвира Бендит, Валентин Лаптев үлэһиттэрэ уонна Бэтэрээннэр сэбиэттэрэ (сал. Валерий Черемных) биир санаанан Пригородпыт сайдарын туһугар былааннаахтык үлэлиибит.

Ол курдук, сылаас тохтобулбутун сууйан-сотон кырааскалаан, олохтоохтору кыһыҥҥы тымныы ыйдарга үөрдүбүппүт. Үс Хатыҥ сиригэр-уотугар түһүлгэ ылан, бары саба түһэн күрүөлээн, кырааскалаан кэбиспиппит. Биир сүбэнэн «Үтүө санаа коробката» бырайыакка кыттыһан, «Лювези»,  «Норма», “Мясной” маҕаһыыннарга туруордубут. Кыаммат араҥа ыалга бородууктанан уонна таҥаһынан көмө оҥоробут.  «Берегиня» оҕо киинигэр Саҥа Дьылга  бэлэхтэри туттарбыппыт уонна эҕэрдэ нүөмэрдэри көрдөрбүппүт. Кырдьаҕастар уонна инбэлииттэр дьиэлэригэр түмсүү актива тиийэн эмиэ бэлэх туттарбыппыт итиэннэ сэргэхситэр курдук сылаас сыһыаны олохтоон кылгас кэнсиэр көрдөрбүппүт.

Ааспыт сылтан саҕалаан байыаннай дьайыы кыттыылаахтарыгар көмөлөһөбүт, ол  курдук блиндаж чүмэчилэрин оҥоробут, эми-тому, күннээҕи туттар малы-салы атыылаһабыт, хаххаланар сиэккэлэри баайабыт, сылаас таҥаһы-сабы, балаакка буолар плащтары (плащ палатки) тигэбит. Манна кыргыттар кыра да иллэҥ кэм көһүннэр эрэ кэлэн сиэккэлэри баайаллар, тигэллэр.

Оҕолор дойдуларыгар бэриниилээх буола улааттыннар, үлэлии үөрэнниннэр диэн,  «Жемчужинка» уһуйаан иитээччилэрэ  уонна 12 №-дээх оскуола үөрэнээччилэрэ, учууталлар биһиэхэ көмө буолаллар. Оскуола оҕолоро былырыын чүмэчи оҥоруутугар бааҥкалары хомуйан, сууйан, бэлэмнээн биэрбиттэрэ.

Нэһилиэкпит ыраас буоллун диэн субуотунньуктары тэрийэбит. Ол курдук, быйылгы сезону түмүктүүр тэрээһиммитигэр кыргыттар көрсөн, кэпсэтэн, былааннары торумнаатыбыт. Пригородпыт стеллатын ыраастаан, кашполары кырааскалаан, сибэкки олортубут.

Саамай көхтөөх активистарбытынан Иванова Елизавета Николаевна, Готовцева Ньургуйаана Прокопьевна, Самойлова Надежда Романовна, Иванова Акулина Николаевна, Постникова Виктория Валерьевна, Илларионова Айталина Ивановна, Строева Наталия Сергеевна, Семенова Анастасия Петровна  буолаллар. Кинилэр үгүстэрэ элбэх оҕолоох ыал ийэлэрэ, үлэлээх, туспа дьарыктаах дьон буолаллар. Ол гынан баран, барыларын  биир үтүө санаа  түмэр — дьоммутугар, дойдубутугар туһаны аҕалыы.

Биһиэхэ АБДь кыттыылаахтарыгар көмө буоларбытыгар, матырыйаал атыылаһыыга күүс-көмө буолар тэрилтэлэрбитигэр махталбытын тиэрдэбит:

​1.​«Выгодная ипотека», «Розовые розы» тэрилтэ салайааччытыгар Анна Туласыноваҕа;

​2.​«Стройуниверсал»  ХЭТ  салайааччыта  Павел Степановка;

​3.​«Айта»  маҕаһыын дириэктэртэригэр Дария Абрамоваҕа;

​4.​«ИП Николаев Мичил» Айтал Обутовка;

​5.​«Сансити»  штора салона –  Аина, Николай Павловтарга;

6. Владимир Скрябиҥҥа уонна Владимир Колесовка.

Маннык амарах санаалаах дьон баар буоланнар үтүө дьыала салҕанар.

Биһиги көхтөөх  волонтердарбыт үлэлэрин сыаналаан, Дьокуускай куорат Дууматын, СӨ Бырабыыталыстыбатын, Уопсастыбаннай балаататын уонна Пригород дьаһалтатын үгүс бочуотунай бэлиэлэринэн, махтал суруктарынан наҕараадаланаллар.

Байыастарбытыгар кытаанах санааны, дойдугут сылаас тыына  араҥаччылаатын, дьоҥҥут өйөбүлэ көмө  буоллун! Күн ахсын биһиги хамсааһыммытыгар көмөлөһүөн баҕалаахтары күүтэбит, биһиги хамсааһыммытыгар кыттыһыҥ!

Пригород сэлиэнньэтинээҕи Дьахталлар түмсүүлэрэ.