Пригороднай бөһүөлэк уһуйаана Кыайыыга сэмэй кылаатын киллэрсэр

Билигин Ийэ дойдубут көмүскэлигэр буола турар байыаннай дьайыы хас биирдиибит сүрэҕин долгутар, дууһатын таарыйар буолуохтаах.

“Пригороднай бөһүөлэк “Жемчужинка” уһуйааныгар байыаннай дьайыыга аналлаах муннук баар. Биһиги төрөппүттэрбититтэн, бииргэ үлэлиир дьоммут дьиэ кэргэттэриттэн Эр дьонноро Ийэ дойдуларын чиэстээхтик көмүскүү сылдьалларынан киэн туттабыт, — диэн кэпсиир төрөппүт Чэмэлиинэ Скрябина. — Бу муннукка иитээччилэр оҕолорун аҕалан киэн тутта кэпсииллэр, сорох оҕолор аҕаларын көрөн истиҥник мичээрдээн ааһаллар. Улахан бөлөх иитиллээччилэрэ аҕаларын, эһээлэрин туһунан ахтыылары оҥороллор”.

“Жемчужинка” уһуйаан үлэһиттэрэ, төрөппүттэрэ байыастарга истиҥ тыллардаах суруктары суруйаллар, төрөөбүт дойдуларыттан бэлэхтэри ыыталлар, өстөөх хараҕа таба көрбөтүн диэн хаххалыыр сиэккэлэри өрөн ыыталлара үтүө  үгэскэ кубулуйбут. Үгүс төрөппүт бөһүөлэк дьахталларын сэбиэтигэр бааллар. Онон көмө наада диэн буолла да, бакыатынан, хоруопканан илдьэн биэрэллэр, туох баар үлэҕэ кытталлар. Бу уопсай үлэлэрэ сыаналанан, “Вместе к Победе” диэн өрөспүүбүлүкэтээҕи оперштабтан махтал суругу туппуттар.

“Маны тэҥэ иитиллээччилэр Ийэ дойдуларыгар бэриниилээх, истиҥ сыһыаннаах буола улааталларын туһугар араас тэрээһиннэри дьарыктар, көрсүһүүлэр ыытыллаллар, манна барытыгар  төрөппүттэр күүс көмө буолабыт, — диир Чэмэлиинэ. — Ол курдук Кыайыы үбүлүөйдээх сылынан байыаннай кэми көрдөрөр экспозиция туруордубут, манна иитээччилэр оҕолорун кытта кэлэн, иһирэх кэпсэтиилэри, дьарыктаныылары ыыталлар.

Хас биирдии киһи эйэлээх олох кэлиэн, оҕолор ыраас халлаан анныгар тэлэһийэ оонньуохтарын баҕарар, биһиги эмиэ ону эрэ кэтэһэбит, Кыайыыны күүтэбит, кыайыахпыт диэн эрэнэбит”.