Хаартыска: Мария Васильева, СИА.
Саха сирэ “Профессионалитет” федеральнай бырайыак иитинэн былырыын “Тыа хаһаайыстыбата” уонна быйыл “Хайаны байытыы” салааларга үөрэх-оҥорон таһаарар кииннэрин (кластердарын) тэрийиигэ, сайыннарыыга федеральнай бүддьүөт суотугар судаарыстыбаттан өйөнөр грант куонкуруһугар кыттан кыайбыта. Онон, уопсайа, 200 мөлүйүөн солк. сүүйбүтэ.
Көрүллүбүт үбүнэн былырыын Дьокуускайдааҕы тыа хаһаайыстыбатын тиэхиньикумун баазатыгар киин тэриллибитэ. Бу кластерга Дьокуускайдааҕы тыа хаһаайыстыбатын тиэхиньикума, Арктикатааҕы хотугу норуоттар кэллиэстэрэ, Өлүөхүмэтээҕи тиэхиньикум, “Арктика” оробуочай каадырдары бэлэмниир киин, Намнааҕы тиэхиньикум, Н.Е.Мординов-Амма Аччыгыйын аатынан Харбалаахтааҕы үөрэх комплекса, Чурапчытааҕы аграрнай-тиэхиньиичэскэй кэллиэс итиэннэ өрөспүүбүлүкэ экэниэмикэтигэр билиҥҥи кэмҥэ быһаччы сыһыаннаах Дьокуускайдааҕы көтөр фабриката, “Хачыкаат” ТХПК киирбиттэрэ.
“Бу кластердар өрөспүүбүлүкэ орто анал үөрэҕин тэрилтэлэрин саҥа таһымҥа таһаарар, үөрэҕи бүтэрбиттэр үлэнэн хааччыллыыларын мэктиэлиир уонна каадыры бэлэмнээһиҥҥэ экэниэмикэҕэ билиҥҥи кэмҥэ быһаччы сыһыаннаах тэрилтэлэри сыһыарар соруктаах аһыллаллар” — диэн СӨ Идэҕэ бэлэмниир үөрэҕи сайыннарар институт мэтэдииһэ Ольга Яковлева этэр.
“Профессионалитет” бырайыагынан былырыын өрөспүүбүлүкэ бүддьүөтүттэн 263 киһи киирбит, итинтэн ситимнээх үөрэҕинэн – 75 киһи. Испииһэккэ барыта аҕыс идэни хаппыттар.
Үөрэх федеральнай судаарыстыбаннай ыстандаарта (ФГОС) саҥардыллан, “Профессионалитет” бырайыагы олоххо киллэриигэ үөрэнии болдьохторо быһа холуйан 11 % кылгаан биэрбиттэр (холобур, 2 сыл 10 ый оннугар 2 сыл 6 ый) буолбуттар.
Үөрэх болдьоҕо уопсай хатыланар дьиссипилиинэлэри, теоретическай чааһы сарбыйыы, быраактыка көдьүүһүн күүһүрдүү суотугар кылгыыр диэн институкка быһаардылар. Ол курдук, холобур, агроном идэтигэр 2 сыл 10 ый үөрэнэр эбит буоллахтарына, аны 2 сыл 6 ыйынан номнуо дьупулуомнаах үлэһит буолуохтара. Ити курдук, тиэхиньик-технолог, ойуур хаһаайыстыбатын исписэлииһэ, агроном, тиэхиньик-механик, бэтэринээр, зоотехник идэлэрин болдьоҕун кылгаппыттар.
Былырыын куонкуруска кыайбыт Саха сирин соҕурууҥҥу технологическай кэллиэһэ (Нерюнгри) быйылгыттан үлэтин саҕалыахтаах. Тустаах үөрэх кыһатыгар эмиэ болдьохторо кылгыыра сабаҕаланар. Бу барыта орто идэлээх эдэр дьон түргэнник үөрэҕи бүтэрэн, үлэнэн хааччыллалларын, үлэһит буолалларын туһугар толкуйдаммыт бырайыактар.
Манна даҕатан эттэххэ, Дьокуускайдааҕы тыа хаһаайыстыбатын тиэхиньикумугар муус устар 22 күнүгэр аһаҕас аан күннэрэ ыытыллаллар. Саҥалыы тыыннаах үөрэх кыһатын, “Профессионалитет” федеральнай бырайыагынан саҥа тэриллибит үөрэтэр-оҥорон таһаарар киин (кластер) үлэтин-хамнаһын кэлэн илэ көрүөххүтүн сөп.
ИДьМ Дьокуускайдааҕы 3-с №-дээх полиция салаатыгар улуус уонна куорат икки ардыгар сүүрэр таксыы суоппарыттан үҥсүү…
Бүгүн Дьокуускай куоракка күүстээх ардах түһэн, үгүс уулуссалар ууга уһуннулар. Суорун Омоллоон уулуссаҕа суол кытыыта…
«Манчаары оонньуулара» спартакиада от ыйын 7-13 күннэригэр Таатта улууһугар ыытыллар. Бу күннэргэ оонньууларга киирии билиэттэр…
Бэс ыйын 16 күнэ. Айсен Николаев Бырабыыталыстыба уонна Ил Дархан дьаһалтатын, итиэннэ Бырабыыталыстыба салалтатын кытта…
РФ бэрэсидьиэнэ Владимир Путин норуоттар икки ардыларынааҕы "Симфония добра" куонкурус-бэстибээл кыттыылаахтарыгар, ыалдьыттарыгар уонна тэрийээччилэригэр эҕэрдэтин…
2000 сыллар саҕаланыыларыгар дискотекаларга «Урааҥхайдар, бааргыт дуо?» диэн тыллардаах эрчимнээх ырыаҕа ыччат тоҥолох-тоҥолоҕуттан ылсан оһуохайдаан…