Прокопий Бубякин: «Дьокутааттар уонна баһылыктар бииргэ үлэлээһиннэрэ ситиһиини мэктиэлиир»

Бу нэдиэлэҕэ СӨ муниципальнай тэриллиилэрин бэрэстэбиитэллээх уорганнарын дьокутааттарын II сийиэһэ уонна Муниципальнай тэриллиилэр сэбиэттэрин IX сийиэстэрэ тигинэччи үлэлээтэ.

Сийиэстэр тустарынан Амма улууһун Эмис нэһилиэгин баһылыга Прокопий Бубякин санаатын үллэстэр:
— Быйылгы сийиэһи баһылыктар өр күүппүппүт. 2020 сылтан талыллыбыт баһылыктар бары бастакы сийиэспит буолар. Бу нэһилиэк баһылыктара уонна өрөспүүбүлүкэ ситэриилээх былааһын уорганнара бииргэ үлэлииллэрин ситимниир. Биир өттүттэн биһиги кыһалҕалаах боппуруостарбытын миэстэтигэр туруоран, тута быһаартарга табыгастаах эбит. Сийиэскэ, тэрилтэлэр, министиэристибэлэр тустаах үлэһиттэрин кытары сирэй көрсөн, боппуруоска быһаччы хоруй ылар түгэн буолар. Дьокутааттар уонна баһылыктар сийиэстэрэ биир кэмҥэ буолбута эмиэ олус сөптөөх дии санаатым. Сокуону оҥорор уонна ситэриилээх былаас уорганнара, дьокутааттар уонна баһылыктар бииргэ үлэлээһиннэрэ ситиһиини мэктиэлиир дии саныыбын.
Сийиэс биэс күнү быһа тигинэччи барда, олус киэҥ ис хоһоонноох тэрээһиннэргэ кытынныбыт, элбэҕи биллибит-көрдүбүт. Дьокуускай куорат араас уораҕайдарыгар: Опера уонна балет тыйаатырыгар, “Арассыыйа – мин историям” историческай пааркаҕа, Ю.А. Гагарин аатынан култуура уонна ускуустуба киинигэр, Дьокуускай куорат дьаһалтатын, Бырабыыталыстаба дьиэтигэр, о.д.а. улахан тэрээһиннэр ыытылыннылар.