Прокопий Константинов ыалы уоттан быыһаата

Бэҕэһээ киэһэ Сунтаар нэһилиэгэр 8 оҕолоох Винокуровтар дьиэлэрэ бүтүннүү уокка былдьанна.

Киэһэ 22.00 ч. саҕана Гагарин уулусса олохтооҕо Прокопий Константинов дьиэ кэргэнин кытта дьонноруттан кэлэн утуйарга оҥосто сырыттахтарына, дьиэлэригэр уоттарын лаампалара дьиримнээн ылбыт. Прокопий дьиэ электричествота туох эрэ буолла диэн уотун автоматыттан араараары баран иһэн, арай түннүгүнэн көрбүтэ чугас ыалларын дьиэтигэр киирэр сирдэригэр уот сырдыргыы турарын көрөөт, уһуну киэҥи толкуйдуу барбакка, таһырдьа ойон тахсан баһаар саҕаланан эрэр дьиэтигэр сүүрэн тиийэр. Кини тиийээтин кытта ааһан иһэр массыына эмиэ тохтообут. Прокопий суоппардыын иккиэн хатыылаах олбуору тоҕо тардан киирэллэр. Прокопий ыаллара элбэх оҕолоохторун билэр буолан түннүгү тоҕо сынньан дьиэлээхтэри ыҥырар. Онтон дьиэҕэ хаһыы-ыһыы буолар. Түннүгүнэн биирдии-биирдии оҕолору таһаартыыр.

“Сунтаар сонуннара” редакция үлэһиттэрэ хорсун санаалаах эдэр уолу Прокопийы үлэлиир маҕаһыыныгар көрсөн кэпсэттибит:

“Бэҕэһээҥҥи күнү кыл түгэнэ быһаарда. Дьиэттэн дьон айманара иһиллибэтин муодарҕыы санаабытым. Ыалларым элбэх оҕолоохторун билэбин. Ол иһин, элбэҕи саныы барбакка сутурукпунан түннүгү алдьаппытым. Оҕолору түннүгүнэн ылбытым. Бу кэмҥэ уот дьиэҕэ киирэн эрэрэ. Дьиэ кэргэн утуйаары сыппыт буолан оҕолор таҥастара суоҕа. Массыынаҕа илдьэн олордуталаабыппыт. Баһаар кэнниттэн элбэх оҕолоох ыал турар бэйэлэринэн эрэ хааллылар. Маннык ыксаллаах түгэҥҥэ саамай сүрүнэ ыксаан ыгылыйан хаалыа суохха наада. Ким баҕарар мин курдук дьаһаныа этэ дии саныыбын. Саамай сүрүнэ бары уоттан тыыннаах хааллылар”, – дьоруой уол бэҕэһээҥҥи хорсун быһыыны санатар түннүгү охсоругар эчэппит илиитин сэмэйдик көрүнэр.

Дьиэлээх хаһаайка, элбэх оҕолоох ийэ Мотрена Осипова Прокопийга махтала улахан: “Биһиги дьолбутугар чугас ыалбыт көрө охсон быыһанныбыт. Буруо сыта дьиэҕэ киирэн эрэр этэ. Хантан сыт кэлэрин көрө-истэ сырыттахпытына түннүк алдьанар тыаһын истэн уолуйан хаалбыппыт. Чугас ыалбыт түннүкпүтүн алдьатан ыҥыртаабыта. Кэргэмминээн бастакы утаа оҕолорбутун санаан түннүгүнэн куоттарарга барбыппыт. Дьиэбититтэн туох да хаалбата… Кыһын саҕаланыыта дьиэтэ-уота, таҥнар таҥаһа, туттар мала-сала суох хааллыбыт. Билигин бары этэҥҥэ буолан чугас аймахтарбытыгар баарбыт”.

Баһаарынай сулууспаҕа иһитиннэрии 21.56 ч. киирбит. Быыһыыр, уоту умулларар этэрээт тутатына кэлэн түргэнник тарҕанар уоту салгыы ыыппатылар. Ол эрэн, дьиэ бүтүннүү кытарарга былдьанна.

“Күн киһитэ көмүскэс, айыы киһитэ аһыныгас” элбэх оҕолоох Винокуровтар дьиэ кэргэттэригэр харчынан көмөҕүтүн бу ыйыллыбыт төлөпүөн нүөмэринэн ыытыаххыт диэн эрэнэбит:

89143017367 Т-банк Мотрена Руслановна О.
89142604437 Сбербанк Жан Геннадиевич В.

Ону тэҥэ, таҥас-сап эмиэ ирдэнэр: 4 саастаах кыыс оҕоҕо, таҥаһын размера 100-105 см, атаҕын таҥаһыгар 23-25 р. кэтэр
2.5 саастаах уол оҕо таҥаһын размера — 95-100 см, атаҕын таҥаһыгар 23-25 р.
6 саастаах уол оҕо таҥаһын размера — 125-130 см, атаҕын таҥаһыгар — 30-32 р.
9 саастаах уол оҕо таҥаһын размера — 140 см, атаҕын таҥаһыгар — 36-37 р.
12 саастаах уол оҕо – 160 см, атаҕын таҥаһыгар — 38-39 р.
14 саастаах кыыс оҕо таҥаһын размера — 158-160 см, атаҕын таҥаһыгар — 36-38 р.
15 саастаах уол оҕо таҥаһын размера — 175 рост. атаҕын таҥаһыгар — 42р.
Ыал ийэтин таҥаһын размера — 50, атаҕын таҥаһа – 38 р.
Ыал аҕатын таҥаһын размера – 52, атаҕын таҥаһа – 40 р.
Кистэл буолбатах, билигин араас быһылаан таҕыстаҕына төлөпүөн үрдүгэр түһэн видеоҕа устан саҕалыыллар.

Онтон Прокопий Константинов бэйэ бодотун ыһыктыбакка, элбэх оҕолоох дьиэ кэргэни уоттан быыһаата. Бу хорсун быһыы наҕараадаҕа тиксэригэр эрэнэбит.

Мира АФАНАСЬЕВА.

Сунтаарсонуннара.рф саайтан.