“Прометей” оскуолатыгар оҕо сайдыыһы

Мин  соторутааҕыта Дьокуус­кай куорат биир улахан түөлбэтин – “Прометей”  оскуолатыгар (дириэктэр Прокопьева М.Л.)  сылдьан, билиҥҥи олох-дьаһах сайдыытын эйгэтин көрдөбүлүгэр сөп түбэһэр, тус бэйэни кытта сыһыаҥҥа киирэр дьикти уруогу көрдүм.

Дьэ, кырдьык, дьикти сэһэннээх дьарык буолла. Дьарыгы 3 кылааска Валентина Семеновна Поскачина тэрийэн ыытта. Ити этиллибит санаат­тан ыйытык үөскүүр: биһиги бары билэр-өйдүүр билии-көрүү ис хоһоонноох уруокпутуттан туох дьикти уратылаах дьарык буолла диэн мин тус бэйэм куппун-сүрбүн долгутта уонна  уһугуннарда. Миэхэ үөскээбит бастакы ыйытык: бу үгэс буолбут билии-көрүү уруога дуо?  Иккис ыйытык: билии-көрүү уруога буол­батах буоллаҕына, бу туох ураты өйдөөх-санаалаах дьарыга буолла? Тэриллибит дьарыкка саамай сүрүн кыттааччы кимий: учуутал – билии­ни биэрээччи? Эбэтэр оҕо сайдар сааһын уратытынан тус бэйэтин кытта сыһыаҥҥа киирэр үөрэнээччи  бэйэтэ  дуу? Хардата  биир – үөрэнээччилэр бэйэлэрин бэйэлэрэ үөрэтэллэр.

“Прометей” түөлбэ Н.И. Шарин аатынан орто оскуолата үөрэх эйгэтигэр – саҥа кэм сэһэнин – киһи, омук, чөл доруобуйа, киһи олоҕун айана диэн үс күлүүс өйдөбүлэ киһиттэн, оҕоттон бэйэтиттэн тутулуктааҕын, оҕо бэйэтэ оҕо сааһыттан өйдөөн, билиҥҥи кэм таһымыттан олох ураты туспа көрүүлээх-сайдыылаах киһи буолара биһиги хайдах үөрэх эйгэтин талан ыларбытыттан тутулуктаах. Оҕо кутун-сүрүн сайыннарар  духуобунас тыына – оскуола дьиҥ  соруга. Бу дьайыы бастакы акылаата түһэн, төрүтэ үөскээн, ача  от курдук кырыстаныа  диэн эрэнэбит.

В.Е.Степанова,

философия билимин хандьыдаата.

Хаартыскалары: ааптар тиксэрдэ.