Провода суох наушниктар кутталламмыттар

Түөкүттэр аны “беспроводной” наушниктар нөҥүө истэргэ, харчыны уорарга үөрэннилэр.

Хара санаалаахтар наушниктар кэбирэх сирдэрин булбуттар уонна тугу кэпсэтэргин истиэхтэрин баҕардахтарына ыраахтан наушниктарга баар микрофону холбуохтарын, бэл диэтэр анал инструменнары туттан, Bluetooth-трафигы “хабан ылан”, расшифровкалаан тэрилгэ буортулаах коду киллэриэхтэрин сөп. Ол түмүгэр түөкүттэр тус дааннайдарга, файлларга, иһитиннэриилэргэ, хантаактарга, баан сыһыарыыларыгар, логиннарга уонна паролларга киирэр кыахтаналлар.

«Газинформсервис» хампаанньа инженер-аналитига Екатерина Едемская этэринэн, Bluetooth 4.2 уонна онтон намыһах биэрсийэлэргэ үлэлиир наушниктар ордук кутталлаахтар.

“Ону таһынан толору шифровката суох Hands-Free Profile курдук Bluetooth-профиллар, ону тэҥэ саҥа аксессуардары холбуулларыгар бэрэбиэркэтин арааран кэбиспит смартфоннара уонна планшеттара эмиэ сэрэхтээхтэр”, — диэтэ кини.

Эспиэр Арассыыйа олохтоохторун урукку моделлаах наушниктары быраҕан, кырата Bluetooth 5.0 өйүүр наушниктары туттарга, наадата суох кэмҥэ араара сылдьарга сүбэлээтэ.