Психиатртан ыспыраапканы хантан ылар табыгастааҕый?

Психоневрология өрөспүүбүлүкэтээҕи диспансера иһитиннэрэринэн, нэһилиэнньэҕэ табыгастаах буоларын туһугар куорат араас оройуонугар хас да кэбиниэт аһылынна.Ол курдук, олунньу 6 күнүттэн быраастар киэһэ 6 чааска диэри үлэлииллэр. Ону  таһынан  e-yakutia.ru саайт нөҥүө суруйтарыахха сөп. Саа сэбиргэлин туһанарга мэдиссиинискэй психологка 509-168 нүөмэринэн суруйтарыллар.

Аадырыстара:

Психолог туоһулуур (освидетельствование)  кэбиниэтэ Петр Алексеев аатынан  уулусса  83/18 а («Невромед») дьиэтигэр баар.  Психиатр-быраас уонна мэдиссиинискэй психологтар үлэлииллэр.

Үлэ эрэһиимэ  — үлэ күннэригэр  8.30-18.00 чч.  Кварцеваниеҕа тохтобул   11.30-11.45 уонна  15.45-16.00 чч.

Психиатр туоһулуур кэбиниэтэ: Автодорожнай, 38,  1 этээс,  3 кэбиниэт (Наркология өрөспүүбүлүкэтээҕи диспансерын дьиэтигэр). Психиатр-быраас уонна  уонна мэдиссиинискэй  психологтар үлэлииллэр.

Үлэ бириэмэтэ — үлэ күннэригэр 8.30-8.00.  Кварцеваниеҕа тохтобул  11.30-11.45 уонна 15.45-16.00.

Психиатр туоһулуур кэбиниэтэ -– Киров уулуссатын 19 (1 нүөмэрдээх поликлиникаҕа уҥа өттүнэн кэтэх аанынан киириллэр, 5 этээс, 531 кэбиниэт) Психиатр-быраас уонна мэдиссиинэ  психолога үлэлииллэр.

Үлэ эрэһиимэ  —  үлэ күннэригэр  8.30-15.45 чч. Кварцеваниеҕа тохтобул 11.30-11.45 чч.

Бу кэбиниэттэргэ барыларыгар психиатр-быраас ыспыраапка биэрэр:

-массыына ыытарга;

-үлэҕэ киирэргэ;

-судаарыстыба кистэлэҥин уонна судаарыстыбаннай сулууспаны кытта сибээстээх үлэҕэ киирэргэ;

-психиатрга диспансер кэтээн көрүүтүн туһунан сибидиэнньэ суоҕун бигэргэтэргэ;

-абитуриеннарга уо.д.а.

Саа сэбигэр көҥүл ыларга -– барыллаан сурутуунан эрэ.

Ханнык кэмҥэ психиатр туоһулааһынын барар түргэний?

Кэнники нэдиэлэтээҕи чахчылары көрдөххө,  үгүстэр  барытын ситиһэ охсоору  эрдэ кэлэ сатыыллар. Ордук элбэх киһи сарсыардаттан 14.00 ч. диэри кэлэр. Дьиҥэр,  2 аадырыска баар кэбиниэттэр 14.00-18.00 чч. диэри үлэлииллэр, дьон аҕыйах буолар. Ол оннугар үгүстэр эрдэ кэлэн уочаракка турарга күһэллэллэр. Онон, кыаллар буоллаҕына, 14.00 ч. кэннэ кэлэргэ сүбэлииллэр. Быраастар хойукка диэри үлэлиир буоланнар, кэлбит дьон бары хабыллар.

Саа сэбин ыларга туоһулааһын туох уратылааҕый?

Арассыыйа Доруобуйа харыстабылыгар министиэристибэтин 2021 сыл сэтинньи 26 күнүнээҕи N 1104н. саҥа бирикээһинэн, кулун тутар 1 күнүттэн мэдиссиинискэй психолог  патопсихологическай (психодиагностическай) көрүүтэ киллэриллэн биэрбитэ.  Чинчийиигэ хас да тиэһи толороҕут уонна биир чаас устата барар. Онон сибээстээн, психиатр-быраас барыларын тута көрө-истэ охсубат. Бастаан психологка көрдөрүллэр. Психологтар үөһээ ыйыллыбыт аадырыстарга барытыгар үлэлииллэр. Ол эрэн, эрдэттэн 509-168 нүөмэргэ үлэ күннэригэр 8.30-17.00 чч. суруйтаран эрэ баран кэлиллэр.

Илдьэ кэлэр докумуоннаргыт -– пааспар, СНИЛС уонна ИНН куоппуйата (саа сэбигэр көҥүлгэ булгуччулаах).