Психолог фейерверктары ытыыттан туттунарга ыҥырда

СӨ Психологическай киин дириэктэрэ Владимир Скрябин байыаннай дьайыылар буолбут сирдэриттэн төннүбүт дьон уйулҕаларын доруобуйатын туһугар салюттары уонна фейерверктары ытыыттан туттунарга ыҥырда.

«Олохтоох нэһилиэнньэҕэ үгэс буолбут сиэрдэр-туомнар уонна үгэстэр наадалаахтар, онно Саҥа дьыллааҕы бырааһынньыктары киллэриэххэ сөп. Ол гынан баран, байыаннай дьайыылар буолбут сирдэриттэн төннүбүт дьону ахтан-санаан бырааһынньыктыыр наада. Холобур, салюттары уонна фейерверктары ытыыттан туттунар ордук. Салайааччылар барытын ситиһэр кыаллыбатын өйдүөхтээхтэр. Ол иһин бэйэни уонна үлэһиттэри сылайан-элэйэн бүтүөхтэригэр диэри үлэлэппэт ордук. Үлэттэн уонна уйулҕа өттүнэн сылайбыт-элэйбит дьон көдьүүһэ суох уонна айдааннаах буолуохтарын сөп, онон сорох соруктартан аккаастана үөрэниэххэ наада», — диэтэ киин дириэктэрэ. Кини бэлиэтээбитинэн, сыл бүтүүтэ — киһи ньиэрбэтэ күүрэр кэмэ. Кини этэринэн, бу киһи уйулҕатын уратыта, сорохтор ону бэйэлэрэ туорууллар, оттон кимиэхэ эрэ психологтар сүбэлэрэ туһалыан сөп.

Ааспыт нэдиэлэҕэ байыаннай дьайыы 300-кэ кыттыылааҕа уонна кинилэр дьиэ кэргэттэрэ Саха сирин психологтарын консультацияларынан хабылыннылар. Өрөспүүбүлүкэ иһигэр, ону тэҥэ Ростов-на-Донуга госпиталь хайысхатынан 330 тус-туһунан уонна бөлөҕүнэн психологическай үлэ ыытылынна. Психологическай Киин психологтарыттан көмөнү уонна өйөбүлү ыларга бу нүөмэргэ эрийэн суруттарыахха сөп: 8 (4112) 31-91-09 (үлэ чааһыгар). Киин улуустардааҕы филиалларын түүннэри-күнүстэри үлэлиир итэҕэл төлөппүөнүн нүөмэрэ: 8-800-100-35-50 эбэтэр 122, онтон 6 уонна 2. Туһаайыылар анонимнайдар уонна кистэлэҥнэр, байыаннай дьайыы хайысхатынан эрэ буолбатах. Бэйэ аатын кистээн, атын аатынан эмиэ суруттарыахха сөп.