Психологтар 1200-тэн тахса консультацияны ыыттылар

Дьокуускайдааҕы психологическай киин психологтара от ыйыгар 1200-тэн тахса бөлөҕүнэн уонна тус консультациялары Ростова-на-Дону куорат балыыһаларыгар ыытта. Бу үлэ анал байыаннай эпэрээссийэ 970 кыттааччытын уонна байыаннай сулууспалаахтар дьиэ кэргэттэрин чилиэннэрин хабар.

“Анал эпэрээссийэ кыттыылаахтарыгар, кинилэр дьиэ кэргэттэрин чилиэннэригэр Өрөспүүбүлүкэтээҕи психологическай киин өҥөтө босхо. Биһиэхэ бары консультация анонимнай уонна конфиденциальнай, байыаннай дьайыы хайысхатынан эрэ буолбатах. Туох да докумуон ирдэммэт, атын аатынан суруттарыаххытын сөп”, — диэн Өрөспүүбүлүкэтээҕи психологическай киин дириэктэрин солбуйааччы Анатолий Кузьмин брифинҥэ кэпсээтэ.

Үлэ чааһыгар суруйтаран көмөнү уонна өйөбүлү ылыаххытын сөп: 8 (4112) 31-91-09 нүөмэргэ эрийэн. Улуустарга баар салааларын төлөпүөннэрин ити нүөмэргэ эрийэн билсиэххитин сөп. Ону таһынан, күнүстэри-түүннэри үлэлиир көмө линията баар: 8-800-100-35-50 эбэтэр 122, онтон 6 уонна 2 баттыыгыт.

Өрөспүүбүлүкэтээҕи психологическай киин үлэтэ Ил Дархан Айсен Николаев сорудаҕынан, бырабыыталыстыба бэрэссэдээтэлин солбуйааччы Ольга Балабкина сүрүннээһининэн, анал байыаннай дьайыы кыттыылаахтарын уонна кинилэр дьиэ кэргэииэрин уйулҕа өттүнэн доруобуйалара чөл буоларыгар туһуланар.