Психологтар госпиталларга үлэлииллэр

Ааспыт нэдиэлэҕэ психологтар өрөспүүбүлүкэҕэ уонна атын эрэгийиэннэргэ госпиталларга баран, 840 киһиэхэ көмөлөстүлэр, 900-тэн тахса бөлөҕүнэн уонна биирдиилээн үлэни ыыттылар. Бу туһунан Өрөспүүбүлүкэтээҕи психологическай киин дириэктэрэ Владимир Скрябин брифиҥҥэ иһитиннэрдэ.

— Ростов-на-Дону хайысхатынан госпиталларга тиийэн, саамай элбэх үлэ оҥоһулунна. Байыастар Саха сирин салалтатыгар уонна психологтарга махталларын тиэрдэллэр. Оттон Саха сиригэр байыаннай дьайыы кыттыылаахтарын чилиэннэригэр тус консультациялар, анал тэрээһиннэр, бөлөҕүнэн үлэлэр тиһигин быспакка ыытылла тураллар, — диэн кини кэпсээтэ.

Психологы кытта үлэлииргэ туох да докумуон ирдэммэт, бэл, ааккын да этимиэххин сөп. Байыаннай дьайыы кыттыылаахтарыгар, кинилэр дьиэ кэргэттэригэр киин психологтарын өҥөтө босхо буолар.

Үлэ кэмигэр 8 (4112) 31-91-09 төлөпүөҥҥэ эрийэн, суруйтарыахха сөп. Оттон эрэнии төлөпүөнэ күнүстэри-түүннэри үлэлиир:  8-800-100-35-50, салгыы 6 уонна 2 баттыыгыт.