Пуондаҕа 45 тыһыынча сайабылыанньа киирбит

«Аҕа дойдуну көмүскээччилэр» судаарыстыбаннай пуонда Саха сиринээҕи салаатын үлэтэ саҕаланыаҕыттан, 11,5 тыһыынчаттан тахса киһиттэн, ол иһигэр 5 тыһыынча анал байыаннай дьайыы кыттыылаахтарыттан уонна кинилэр дьиэ кэргэттэриттэн 45 тыһыынчаттан тахса сайабылыанньа киирдэ.

«Киирбит боппуруостартан 93%-рын кэриҥэ бүгүн быһаарылынна. Байыаннай сулууспалаахтар уонна кинилэр дьиэ кэргэттэрин чилиэннэрин көрдөһүүлэрэ 55% ылар», — диэн судаарыстыбаннай пуонда өрөспүүбүлүкэҕэ салаатын салайааччытын солбуйааччы Лилия Голикова от ыйын 1 күнүгэр ыытыллыбыт брифиҥҥэ кэпсээтэ.

Кини этэринэн, билигин судаарыстыбаннай пуонда салаатыгар 167 инбэлиит бэтэрээн учуокка турар. Тэрилтэ кинилэр наадаларын быһааран, федеральнай испииһэккэ киирбэтэх тэхиньиичэскэй реабилитациялыыр тэрилинэн хааччыйар үлэни ыытар. Бу спортивнай протезтар уонна спортивнай коляскалар, актыыбынай олоҕу тутуһар уонна спорка оонньуон баҕалаах дьоҥҥо анаан  20 байыаска бэриллэр. Киин офиска ыытыллыбыт 20 сайабылыанньаттан 16 сайабылыанньаны судаарыстыбаннай пуонда Экспертнай Сэбиэтэ бигэргэттэ. 2 инбэлиит байыаска үрдүк маневреннай электрическэй кэлээскилэр бэрилиннилэр.

Бүгүн ТСР-ы хааччыйыы өттүнэн саҥа хайысха киирдэ. Бу сэрии бэтэрээннэри адаптивнай таҥаһынан хааччыйыы буолар. Маннык таҥаһынан 66 киһини хааччыйыы былааннанар. Бу, бастатан туран, паллиативнай статустаах, ампутациялаах, ыарахан ыарыылаах инбэлииттэр.

Бүгүҥҥү күҥҥэ 18 сайабылыанньа киирбит.

«Биһиги боломуочуйабыт иһинэн Ортомед + Протез киинин кытта үлэлэһэбит. Сертификатка баар протез сыаната  дьиҥнээх сыанатыттан намыһах буоллаҕына, СФР биэрбит электроннай сертификатыгар эбии төлөбүр оҥоһуллар. Бойобуой эмсэҕэлээһин түмүгэр инбэлиит буолбут байыаннайдарга 1 мөлүйүөн солкуобайы төлөөһүҥҥэ эмиэ үлэни салгыыбыт. Доруобуйаларыгар хааччахтаах 87 байыас бу үбү ылла», — диэн судаарыстыбаннай пуонда өрөспүүбүлүкэҕэ салаатын салайааччытын солбуйааччы кэпсээтэ.

Сиһилии: https://www.sakha.gov.ru/news/7547