«Путь воина»: Бэҕэһээҥҥи күн түмүгүнэн «Соболь» хамаанда кыайыыны ситистэ

«Путь воина» байыаннай-тактическай күрэхтэһиигэ бэҕэһээ Волгоградскай уобалас «Сталинград» уонна Тюменьскай уобалас «Соболь» хамаандалара күөн көрүстүлэр.

Оонньуу кэмигэр Тюмень курсаннара уопсайа 7058 м сири ортотунан 3,64 км/ч сүүрдүлэр, оттон Волгоград уобалаһын хамаандата – 7037 миэтирэни 2,37 км/ч кэллилэр. Күүрээннээх киирсии түмүгэр «Сталинград» хамаандата кыргыһыы хонуутугар бүтүннүү «охтубут», байыастар бары туораабыттар. Оттон «Соболь» хамаандатыгар 7 байыас туораабыт. Оонньуу 6 чаас 6 мүнүүтэ 29 сөкүүндэ барбыт.
Хамаандалар маннык тургутууга үрдүк бэлэмнээхтик уонна кыайыыга дьулуурдаахтарын көрдөрдүлэр. Кинилэргэ 25 кв. килэмиэтир иэннээх уустук сиргэ лазертаг систиэмэтин, интегрированнай камералаах снайперскай бинтиэпкэлэри, FPV-дроннары туһанан усулуобунай өстөөх бөлөҕүн булан «суох оҥоруу» соруктаахтар. Кыттааччылар сири-уоту быһаарарга аныгы тэриллэри, араадьыйа сибээһи, БПЛА-ны тутуннулар. Кинилэр окуопа хастан сыттылар, разведкаҕа сырыттылар, «өстөөҕү» эргийэн барар фланговай албастары тутуннулар.

«Күн-дьыл тымныйыыта, күүстээх тыал – ону аахсыбакка, эһиги чиэстээхтик уонна дьоһуннаахтык сорудаҕы толордугут. Тюмень уобалаһын хамаандата арыый ордуктук кииристэ. Кини күрэхтэһии иккис полуфиналын кыайыылааҕынан буолан, финалга таҕыста. Маладьыастар!» – диэтэ «ВОИН» киин дириэктэрин байыаннай бэлэмнэниигэ бастакы солбуйааччыта, оонньуулар салайааччыларын солбуйааччы Дмитрий Кириенко.

Эрдэ «ВОИН» киин хамандыыра, оонньуулар салайааччылара, Арассыыйа Дьоруойа, «Дьоруойдар кэмнэрэ» бэрэсидьиэн бырагырааматын кыттыылааҕа Андраник Гаспарян бу күрэхтэһиигэ кыттааччылар бары — кыайыылаахтар, «биһиги курсаннарбыт оҥороллорун, хас биирдии 30 саастаах эр киһи кыайар дьоҕура суох» диэн этэн турар.

«Биһиги  туруоруллубут сорудаҕы тохтообокко толоруохпутун баҕарбыппыт. Күн-дьыл туруга мэһэйдээтэ. Ол да буоллар, барыта былааннаабыппыт курдук буолла», – диэн эттэ Тюмень хамаандатын курсана Раиф Алиев.

Кини напарницата, снайпер Надежда Огай эппитинэн, кинилэр былааннара – түргэнник хамсанарга диэн эбит: «Тоһуурга сыппыппыт, ол эрээри «өстөөх» атын өттүттэн кэлбитэ, биһиги тута утарылаһыы оҥорбуппут. Саамай ыарахана сибээһи кэтэһии этэ. Утарылаһааччыларбыт – маладьыастар! Бары – кыайыылаахтар, дьиҥнээх буойуннар! Тэрээһин өттүнэн ыллахха, эмиэ олус үчүгэй!».

«Сталинград» сыыһатын хамандыыр Андрей Мячин ырытта. Кини этэринэн, «Путь воина» күрэхтэһии хас биирдии кыттааччыга улахан уопуту биэрдэ: «Кыргыһыы саҕаламмытыгар тулуурбут тиийбэтэ. Ытыалаһыыга, уопуппут суох буолан, өйбүт-санаабыт ыһыллан хаалбыта. Ити биирэ. Иккиһинэн – ойуурга эрчиллиибит уопуппут кыра. Үсүһүнэн – бары хомулла охсубатыбыт. Оттон күн-дьыл туругун сөбүлээтим. Чуолаан хаар түһэр кэмигэр хаамар ордук табыгастаах этэ, тоҕо диэтэххэ, киһи хаар быыһыгар  улаханнык көстүбэт. Эрдэ маннык оонньуу биһиэхэ суох этэ, онон бу олус үчүгэй уопут буолар. Бары бэйэлэрин кыахтарынан үлэлээтилэр дии саныыбын. Маладьыастар!».

Санатан эттэххэ, күрэхтэһии бастакы күнүгэр Саха сирин «Боотур» хамаандата Хабаровскай кыраай «Амур буойуннара» хамаанданы кыайбыта.

Кинилэр бэҕэһээ култуура бырагырааматын чэрчитинэн «Диодорова» уонна Саха сирин норуоттарын муусукатын уонна фольклорун түмэлигэр, Аан дойду хомуһун түмэлигэр, ону тэҥэ П.А. Лазарев аатынан Сэлии түмэлигэр сырыттылар.

Күрэхтэһии СӨ Бырабыыталыстыбатын уонна РФ бойобуой снайпиҥҥа федерациятын өйөбүллэринэн, «ВОИН» киин тэрийиитинэн ыытыллар.

Финал балаҕан ыйын 19 күнүгэр буолуо, балаҕан ыйын 20 күнүгэр — наҕараадалааһын уонна күрэхтэһии сабыллыыта.

Санатан эттэххэ, «Путь воина» байыаннай-тактическай күрэхтэһии РФ бырабыыталыстыбатын бэрэссэдээтэлин солбуйааччы — РФ бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, «ВОИН» киин кэтээн көрөр сэбиэтин бэрэссэдээтэлэ Юрий Трутнев көҕүлээһининэн ыытыллар.