«Путь воина» күрэхтэһии үөрүүлээх быһыыга-майгыга аһылынна

Бүгүн «Энергетик» оҕо лааҕырын баазатыгар Бүтүн Арассыыйатааҕы байыаннай-тактическай «Путь воина» күрэхтэһии үөрүүлээх быһыыга-майгыга аһылынна.

Күрэхтэһии кыттыылаахтара бу лааҕырга олорон балаҕан ыйын 15 күнүттэн 20 күнүгэр диэри күрэхтэһиэхтэрэ.

Тюменьскай уобалас хамаандата сарсыарда туманнаах буолан,  сөмөлүөттэрэ Нерюнгрига түһэн, хойутаан көтөн кэлэн, оптуобустан түһээт тэрээһин аһыллыытыгар тута кытыннылар. Күрэхтэһиини аһар тэрээһин сахалыы үгэһинэн сири-уоту аһатыынан, алгыһынан аһылынна. Ол кэннэ Арассыыйа, Саха сирин уонна “Воин” былаахтарын киллэрдилэр, өрөгөй ырыата ньиргиччи тыаһаата.

Тэрээһин «ВОИН» киин хамандыырын, Арассыыйа Дьоруойун Андраник Гаспарян уонна Саха Өрөспүүбүлүкэтин Ил Дарханын Айсен Николаев тыл этиилэринэн саҕаланна. Бу үөрүүлээх аһыллыы түгэнигэр РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокуругун боломуочуйалаах бэрэстэбиитэлэ Юрий Трутнев эҕэрдэтин ааҕан иһитиннэрдилэр. «ВОИН» киини тэрийэрбитигэр, биһиги эһигини күүстээх санаалаах, эппиэтинэстээх, чугас дьоҥҥутун, дойдугутун – Арассыыйаны – көмүскүүргэ бэлэм буоларгыт туһунан толкуйдаабыппыт. Бу соругу быһаарар туһугар эһигини кытары анал байыаннай дьайыыны ааспыт инструктордар үлэлэһэллэр. Бу күрэхтэһии саамай күүстээхтэри уонна настаабынньыктар курсаннары ханна ордук үчүгэйдик бэлэмнииллэрин быһаарарга көмөлөһүөҕэ», — диэн Юрий Трутнев бэйэтин этиитигэр бэлиэтээбит.

«Эһиги бары улахан тургутуулары ааспыт, хас да күрэхтэһиигэ кыайан, талыллан кэлбит кыттаачыларгыт. Аҕа дойду кэлэр көлүөнэ көмүскээччилэрин иитиигэ бу күрэхтэһии улахан суолталаах. Айсен Николаевка өйөбүлүн уонна өрөспүүбүлүкэ истиҥник көрсүбүтүн иһин махтанабын», — диэн Андраник Гаспарян эттэ.

Айсен Николаев бу курдук суолталаах патриотическай бырайыагы ыытарга биһиги өрөспүүбүлүкэбит талыллыбытынан киэн туттарын биллэрдэ, кыттааччылар үрдүк бэлэмнээхтэрин бэлиэтээтэ. «Дойдуга билигин уустук, анал байыаннай дьайыы балаһыанньата бүрүүкээн турар кэмэ. Биһиги биир дойдулаахтарбыт, дойдуларын көмүскүү сылдьаллар. Саха сирэ 12 Арассыыйа Дьоруойданна. Эһиги эмиэ инникитин дойдуну көмүскүүр дьон буолуоххут. Күрэхтэһии хайдах түмүктээх буоларыттан тутулуга суох, эһиги хас биирдиигит дьиҥнээх кыайыылаахтаргыт», — диэн Айсен Николаев эттэ.

Оттон «ВОИН» Киин дириэктэрэ Дмитрий Шевченко дьиҥнээх көмүскээччи суолугар дьиссипилиинэ уонна хорсун быһыы суолтатын бэрт кылгастык тоһоҕолоон эттэ.

Үөрүүлээх түгэн кэнниттэн, курсаннар Арассыыйа Дьоруойдарын кытары көрүстүлэр, атах тэпсэн олорон кэпсэттилэр. Арассыыйа Дьоруойдара Александр Колесов уонна Николай Соловьев бэйэлэрин уонна бойобуой сырыыларын, анал байыаннай дьайыы туһунан кэпсээтилэр. Көрсүһүүнү анал байыаннай дьайыы кыттыылааҕа, СӨ ыччатын миниистирэ иилээн-саҕалаан ыытта.

Санатан эттэххэ, күрэхтэһиигэ Арассыыйа араас эрэгийиэннэригэр ыытыллыбыт күрэхтэһиилэртэн сүүмэрдэнэн кэлбит түөрт эрэгийиэн хамаандата кыттар. Түмүктүүр түһүмэх балаҕан ыйын 19 күнүгэр буолуо, оттон балаҕан ыйын 20 күнүгэр наҕараадалааһын ыытыллыа. Күрэхтэһиилэр кэмнэригэр курсаннар төһө бэлэмнээхтэрин, хамаанданан үлэлэрин уонна маастарыстыбаларын көрдөрдүөхтэрэ.

Күрэхтэһии биир уратытынан 25 квадратнай килэмиэтир иэннээх уустук сиргэ ыытыллыыта буолар. Хамаандалар тактическай бөлөхтөргө арахсан, лазертакка аналлаах сибээһи туһанан усулуобунай өстөөҕү «суох оҥоруохтаахтар». Хамаандалар аныгы снаряжениены, ол иһигэр дроннары уонна араадьыйа тэриллэрин туһанныахтара.

Хас биирдии хамаанда араас исписэлиистэртэн, ол иһигэр снайпердартан, медиктэртэн уонна БПЛА оператордарыттан, турар, онон дьиҥнээх байыаннай эрчиллии быһыытынан барыа.

«Геоскан» тэрилтэни кытары бииргэ үлэлээһин онлайн-видеотрансляция дьиҥнээх бириэмэҕэ учуоттуур систиэмэни тэрийэргэ кыаҕы биэртэ.

Күрэхтэһии ыытылларыгар куттал суох буолуутун Арассыыйа ИДьМ, Росгвардия уонна ЫБММ күүстэрэ хааччыйыахтара.

Күрэхтэһиини тэрийиигэ «ВОИН» киин киин аппараатын 36 үлэһитэ уонна 13 филиалын бэрэстэбиитэлэ кыттар. «Путь воина» күрэхтэһии Аҕа дойдуга бэриниилээх, эппиэтинэстээх уонна бэлэмнээх көмүскээччилэри иитиигэ улахан хардыынан буолар.