Путин Арҕаа дойдулары кытта сыһыан туһунан сүрүн этиилэрэ

Алтынньы 22 күнүгэр АХШ бэрэсидьиэнэ Дональд Трамп Будапешка Владимир Путины кытта көрсүһүүтүн көтүрэрин туһунан эппитэ. Эбиитин «Роснефть» уонна «Лукойл» утары хааччахтары киллэрбитэ.

Ол төрүөтүн АХШ Арассыыйа «эйэлээх процесска улахан интэриэһэ суох» диэн быһаарбыт. Хааччахтааһыҥҥа Арассыыйаҕа регистрацияламмыт бу хампаанньалар 34 дочернай хампаанньалара түбэстилэр. Ону таһынан, бу тэрилтэлэр биирдиилээн эбэтэр хаһыа да буолан быһаччы эбэтэр ойоҕостон хонтуруоллуур бары юридическай сирэйдэрин баайдара-үптэрэ тоҥоруллубут.

Мантан ситимнээн дойдубут бэрэсидьиэнэ Владимир Путин Арҕаа дойдулары кытта сыһыан туһунан эппититтэн сүрүннэрин билиһиннэрэбит:

Путин Трамп саммит туһунан сайабылыанньатын, көрсүһүүнү көһөрүү туһунан этиллэр буолуохтаах, диэтэ.

Арассыыйаны утары киллэриллибит  саҥа хааччахтар дойду экономическай туругар улаханнык дьайыахтара суоҕа. Арассыыйа энергетиката эрэллээх, ол эрээри хоромньу да баар буолуоҕа.

АХШ хааччахтара — Арассыыйаны кыһарыйа, баттыы сатааһын. Киевка Tomahawk аракыаталары биэриэххэ сөбүн туһунан кэпсэтиилэр – балаһыанньаны сытыырхатарга сорунуу буолар.

Арассыыйа сирин-уотун Tomahawkынан ытар түгэннэригэр Арассыыйа эппиэтэ «соһумар диэн этиллибэт буоллаҕына, кутталлаах» буолуоҕа.

Аан дойду энергетическэй туругар Арассыыйа киллэрэр кылаата олус улахан, ол кэһиллиитэ — итини киллэрэ сатыыр дойдулар интэриэстэригэр сөп түбэспэт. Бэрэсидьиэн саҥа хааччахтар аан дойду энергетическэй ырыынагар дьайыахтара суоҕа диэн эрэнэрин биллэрдэ.

Путин Трампы кытта Арассыыйа таһаарар ньиэбин тула үөскүүр ситуация аан дойду сыанатыгар, ол иһигэр Холбоһуктаах Штаттарга эмиэ дьайарын туһунан кэпсэппиттэрин эттэ.  Бэрэсидьиэн кэлэр уонунан сылларга углеводородтара суох син биир сатамматтарын тоһоҕолоон бэлиэтээтэ.

Өскөтө баттыы, ыга сатыыртан тэйэн, кэскили туһулаан кэпсэтэр буоллахха, Арассыыйа уонна АХШ бииргэ үлэлиир хайысхалара элбэх. Арассыыйа кэпсэтиилэр салҕаналларын куруук өйүүр, диэн иһитиннэрэр РИА Сонуннар.