Путин уонна Трамп көрсүһүүлэрэ Аляскаҕа буолуоҕа

Арассыыйа уонна АХШ бэрэсидьиэннэрин Владимир Путин уонна Дональд Трамп көрсүһүүлэрэ атырдьах ыйын 15 күнүгэр Аляскаҕа буолуоҕа диэн Арассыыйа лидерын көмөлөһөөччүтэ Юрий Ушаков иһитиннэрдэ.

Бу иннинэ субуота буолар түүнүгэр итини Үрүҥ Дьиэ баһылыга биллэрбитэ, диэн РИА-Новости суруйар. «Америка өттө Арассыыйа уонна АХШ бэрэсидьиэннэрин Владимир Путин уонна Дональд Трамп көрсүһүүлэрин атырдьах ыйын 15 күнүгэр, бээтинсэҕэ, Аляскаҕа тэрийэр туһунан сөбүлэһии ситиһиллибитин саҥа биллэрдэ. Арассыыйа уонна АХШ – чугас ыаллыылар, бэйэ-бэйэлэрин кытта кыраныыссалаһаллар. Онон биһиги дэлэгээссийэбит Беринг силбэһиитин нөҥүө көтөн тиийэрэ уонна икки дойду лидердэрин маннык суолталаах уонна күүтүүлээх саммиттара чуолаан Аляскаҕа ыытыллара толору оруннаах», — диэтэ Кириэмил бэрэстэбиитэлэ.

Ушаков атын этиилэрэ:

• — Лидердэр Украина кириисиһин уһун болдьохтоох эйэлээх быһаарыытын ситиһэр ньымалары ырытыыга болҕомтолорун ууруохтара;
• — Москва уонна Вашингтон чугастааҕы күннэри көрсүһүүгэ көхтөөх уонна күүрүүлээх үлэҕэ аныахтара;
• — Аныгыскы саммит Арассыыйаҕа ыытыллыан сөп, Трампка ыҥырыы номнуо тиэрдилиннэ;
• — Аляскаҕа уонна Арктикаҕа икки дойду экэнэмиичэскэй интэриэстэрэ быһа охсуһаллар уонна киэҥ хабааннаах бырайыактары олоххо киллэрии кэскилэ көстөр.

Санатан эттэххэ, сэрэдэҕэ Путин Кириэмилгэ  Трамп анал посланнигын Стивен Уиткоффу кытта көрүспүтэ, кэпсэтии үс чаастан ордук уһаабыта. Америка бэрэстэбиитэлин нөҥүө дойдулар лидердэрэ Украина боппуруоһугар санааларын атастаспыттара, итини таһынан Москва уонна Вашингтон стратегическай бииргэ үлэлээһиннэрин сайдыытын кэскилэ ырытыллыбыта. Сарсыныгар Ушаков Москва уонна Вашингтон чугастааҕы күннэргэ Путин уонна Трамп саммиттарын ыытарга сөбүлэспиттэрин туһунан иһитиннэрбитэ.