Путиннаах Трамп кэпсэтиилэриттэн сүрүнүн талан көрдөххө

Бэҕэһээ аан дойду барыта Владимир Путин уонна Дональд Трамп төлөпүөнүнэн тугу кэпсэппиттэрин түмүгүн кэтэстэ. Онон икки лиидэр кэпсэтиилэринэн Кириэмил тугу иһитиннэрэр?
Кэпсэтии кэмигэр Дональд Трамп Арассыыйа уонна Украина 30 күн устатыгар энергетическэй инфраструктура эбийиэктэригэр хардары таары охсуулары оҥорботторугар этии киллэрдэ. Владимир Путин бу көҕүлээһини өйөөтө уонна тута Арассыыйа байыаннайдарыгар тустаах хамаанданы биэрдэ.
Аан дойдуга куттал суох буолуутун хааччыйыыга ураты эппиэтинэһи учуоттаан, сыһыаны сөптөөхтүк олохтуурга икки өттүттэн интэриэстээхтэрин биллэрдилэр. Экэниэмикэ уонна энэргиэтикэ салаатыгар бэйэ-бэйэҕэ туһалаах бииргэ үлэлээһини сайыннарар хас да санаа ырытылынна.
Путин сэрэдэҕэ Арассыыйа уонна Украина икки ардыларыгар 175-һи 175-кэ формуланан билиэннэйдэри атастаһыы ыытыллыа диэн иһитиннэрдэ. Ону таһынан Арассыыйа госпиталларыгар эмтэнэ сытар ыарахан туруктаах 23 билиэннэйи Украинаҕа төннөрүөхтэрэ.
Трамп Хара муораҕа суудуналар куттала суох сылдьаллара наадатын туһунан этиитин, Путин бу боппуруоска салгыы үлэлэһиэхпит диэн ис хоһоонноох хоруйдаата. Маннык дуогабары оҥорсорго деталлары эбии чуолкайдыыр кэпсэтиилэр бараллара наадатын ыйда.
Лиидэрдэр икки өттүттэн Украина иирсээнин тохтотор санааларын бигэргэттилэр. Ол сыалтан Арассыыйа уонна Америка экспертнэй бөлөхтөрө тэриллэн эрэллэр.
Бэрэсидьиэннэр стратегическай сэби-сэбиргэли тарҕатыыны тохтотор хайаан да наадалааҕын дьүүллэстилэр.
Путин уонна Трамп сибээскэ сылдьар туһунан дуогабардастылар.
Кэпсэтии түмүгэр Путин хоккейга НХЛ уонна КХЛ оонньуур американскай уонна российскай хоккеистар икки ардыларыгар хоккейнай матчтары АХШ-ка уонна Арассыыйаҕа тэрийэр туһунан көҕүлээһинин Трамп өйөөтө.
Дьэ итинник балачча өр кэмнээх тоҥоруу кэнниттэн аан дойду икки тутаах судаарыстыбаларын лиидэрдэрэ Украина иирсээнин тохтотууга, ил-эйэ олохтоноругар бастакы хардыыны оҥордулар. Салгыы бу сыһыан өссө кэҥээн, дириҥээн, үтүө эркиннээх буолан иһэригэр эрэниэҕиҥ.
Сообщить об опечатке
Текст, который будет отправлен нашим редакторам: