QR-коду сканердаан, харчыны сүтэрэр куттал баарын сэрэттилэр

Аны түөкүннэр сымыйа QR-кодтары туһанар буолбуттар. Ону сканердаан, дьон харчытын түөкүннэр счеттарыгар ыытар кутталламмыт. Бу туһунан дойду ИДьМ пресс-киинигэр иһитиннэрдилэр.

«Туһанааччы коду аахсыйаҕа эбэтэр чэпчэтиигэ сирдиэ дии санаан сканердыыр, ол оннугар харчыта түөкүн счетугар ыытыллар», — диэн иһитиннэриигэ этиллэр. Бу туһунан ТАСС суруйар.

Урут эспиэрдэр бэлиэтээбиттэринэн, сымыйа саайтары уонна араас сонуннары тарҕатан туһанан түөкүннээһин ахсаана биллэрдик үрдээбит. Онно түөкүннэр олохтоохторго судаарыстыбаттан сымыйа төлөбүрдэри эрэннэрэллэр, киһи тус уонна баанын дааннайдарын хомуйар сигэлэри, QR-кодтары тарҕаталлар.

Киин Баан дааннайынан, былырыын түөкүннэр дьайыыларыттан олохтоохтор хоромньулара рекорднай 27,5 млрд солкуобайы куоһарбыт.