Рассадин, Тютрин, Егоров, Белолюбскай уонна Окороков аан дойду чөмпүйэнээтигэр кыттыахтара

Саха тустууктара Хорватияҕа ыытыллар аан дойду чөмпүйэнээтигэр кыттарга бэлэмнэнэ сылдьаллар. 

Чөмпүйэнээт эрдэтээҥи сайаапкатыгар Европа чөмпүйүөнэ Владимир Егоров, аан дойду чөмпүйэнээтин призера Арыйаан Тютрин, Албанияҕа ыытыллыбыт рейтиннээх турнир үрүҥ көмүс мэтээлин хаһаайына Айаал Белолюбскай (бары — 57 кг), Океания чөмпүйүөнэ Георгий Окороков (61 кг) уонна Олимпийскай оонньуулар кыттыылааҕа Виктор Рассадин (70 кг) киирдилэр.

Көҥүл тустуу бырагырааматыгар 300-тэн тахса спортсмен, ол иһигэр аан дойду тустуутун сулустара бааллар.

Сэтинньи 13 күнүгэр Виктор Рассадин уонна Георгий Окороков киирсиилэрин саҕалыахтара, онтон сарсыныгар Владимир Егоровы, Арыйаан Тютрины уонна Айаал Белолюбскайы көрүөхпүт, диэн иһитиннэрэр «Триумф» спортивнай бэлэмнэнии киинэ.