Рассадиннаахха көмөнү хомуйаллар

Балаҕан ыйын 30 күнэ үүнэр түүнүгэр Дагестаҥҥа Хасавюрт куоракка «Киев» гостиница умайан, бүтүннүү уокка былдьанна. Онно биллэр спортсмеммыт Виктор Рассадин тириэньэрин кытта бааллара дуо?

«Баһаарга Виктор Рассадин тириэньэрэ Артур Константиновы кытта уокка былдьана сыстылар. Кинилэр Коркин күрэхтэһиитин иннинэ «сбордана» сылдьаллар. Түүн 12 чааска нэһиилэ атах сыгынньаҕын куотан тахсыбыттар… Докумуоннара, төлөпүөннэрэ, харчылара, каарталара, таҥастара-саптара барыта умайбыт… Аҕыйах мүнүүтэ иһигэр гостиницаттан туох да ордубатах. Дьон бөҕө түннүгүнэн ыстаммыт, Иэдээн буола сыспыт! 

Бачча үрдүк таһымҥа күрэхтэһэ сылдьар, элбэҕи эрэнэр дьоммутугар көмөлөһүөҕүҥ! Маннык ыарахан кэмҥэ кыра да көмө наада, ким төһө кыахтааҕынан» диэн иһитиннэрии социальнай ситимнэринэн тарҕана сылдьар.

Онно спортивнай суруналыыс Николай Бястинов нүөмэрэ ыйыллыбыт. Киниэхэ эрийэ сырыттыбыт.

— Чахчы, баһаарга уолаттарбыт турар бэйэлэринэн хааллылар. Дьон-сэргэ, спорду сэҥээрээччилэр чугастык ылынан, харчы ыытан эрэллэр. Субу чааска, сарсыарда 10 чаас саҕана барыта  238 тыһыынча солкуобай киирдэ. Өссө да ыытыахтара буолуо. Ону киэһээҥҥэ диэри өссө мунньан баран, Артур Константиновка ыытыам. Кини «симкатын» чөлүгэр түһэртэрбит. Ону Виктордыын үллэстиэхтэрэ буоллаҕа, — диэн кэпсээтэ.

Чахчы, саха дьоно амарах сүрэхтээхтэр, иэдээҥҥэ түбэспит киһиэхэ, кыһалҕалаахха көмөлөһөр идэлээхтэр. Нууччалыы эттэххэ, спортивнай «братство» эйгэтэ күүстээх, түмсүүлээх.

Дагестан Силиэстийэлиир управлениета иһитиннэрбитинэн, бу баһаарга биир киһи тыына быстыбыт, биир киһи ыараханнык эчэйэн,  балыыһаҕа киирбит. Аҕыс киһи бэйэлэрэ куотан тахсыбыттар, кинилэр эмсэҕэлээбэтэхтэр. Силиэстийэ барыллаан сабаҕалаабытынан, баһаар элэктэриичистибэ эргэрбит боруобатыттан барбыт буолуон сөп. РФ Холуобунай кодексын 238 ыстатыйатын 2-с чааһынан холуобунай дьыала тэрилиннэ. Миэстэтигэр силиэдэбэтэллэр үлэлииллэр.