Реабилитационнай кииҥҥэ оҕоттон күһэйэн туран харчы ылбыттар

Дьокуускайга сааһын ситэ илик оҕолор реабилитацияланар кииннэригэр 16 саастаах оҕоттон күһэйэн туран харчы көрдөөбүттэр. Бу туһунан ИДьМ пресс-сулууспата иһитиннэрэр.

Оҕоттон манна олорор кииҥҥэ тэҥ саастыылаахтара харчы ирдээбиттэр, төлөпүөнүн былдьаабыттар.

Бу туһунан оҕо ПДН инспекторыгар профилактическай кэпсэтии кэмигэр билиммит. Анараа оҕолор уолу кырбыах буолан сааммыттар. Кырбаммат туһуттан уол кинилэргэ ый устата 16 тыһ.солк. харчыны ыыппыт. Ол даҕаны кэнниттэн анараа оҕолор уоскуйбатахтар, аны 7 тыһ.солк. суумалаах төлөпүөнүн былдьаабыттар.

Быһылааны мессенджергэ кэпсэтии уонна уол харчыны ыыппытын туһунан квитанциялар туоһулууллар.

ИДьМ дааннайдарынан, профилактическай учуокка эрдэ 15 саастаах оҕо эрэ турбут, оттон манна кыттыгастаах 16 саастаах оҕо эрдэ полицияҕа түбэһэ сылдьыбатах. Кинилэр бу кииҥҥэ эппэкиинниир дьиэ кэргэттэрэ аккаастаммыттарын кэнниттэн кэлбиттэр. Оттон эмсэҕэлээбит оҕо төрөппүттэрэ иһэр-аһыыр буолан эмиэ бу социальнай тэрилтэҕэ киллэриллибит.

Быһылаан кэнниттэн 15 саастаах уорбалааччыны атын филиалга ыыппыттар, оттон кини 16 саастаах доҕоро үөрэҕин  уопсайыгар олорор.