«Республика кино-2022» диэн кылгас киинэ бэстибээлэ түмүктэннэ

Дьокуускай куоракка «Республика кино-2022» диэн кылгас киинэ бэстибээлэ түмүктэннэ. Бэстибээл иккис төгүлүн ыытыллар. Куонкуруска 100-тэн тахса кылгас киинэ ааптардара сайаапка киллэрбиттэриттэн 35 үлэ талыллыбыт. Бэстибээл кыайыылааҕынан режиссёр Евгений Николаев “Ку-ку” диэн киинэтэ ааттанна.

Бастыҥ режиссер аатын “Кыра киһи” диэн киинэ ааптара Аполлон Степанов сүктэ.  Дьүүллүүр сүбэ анал бирииһин “Маринад” диэн кылгас лиэнтэни устубут Василий Слепцов ылла.  Иннокентий Аммосов аатынан Саха сирин киинэ оператордарын бирииһин “Ку-ку” хартыынаны устубут операторга Андрей Егоровка туттардылар.  Бастыҥ документальнай киинэ номинация кыайыылааҕынан  “Удельный” киинэ ааптара Александр Красновскай уонна бастыҥ анимация кыайыылааҕынан «Арай биирдэ киинэ» ааптара  Дамир Сусликов буоллулар.  Бастыҥ муусукалаах хартыына номинация  хаһаайынынан «Khotugu Khomugun — Mokinqa Omolgon» киинэ ааптара Дорхоон Дохсун Ворогушин буолла.