Рестобарга киһини эчэтиинэн холуобунай дьыала көбүтүлүннэ

Киин куоракка түүҥҥү кулууптарга буруйу оҥоруу, охсуһуу нэдиэлэ ахсын кэриэтэ тахса турар.  Ааспыт сыл ахсынньы бүтүүтэ Дьокуускайга Дзержинскэй уулуссаҕа баар рестобарга киһи доруобуйатын эчэтиинэн полиция суһал-ирдиир үлэни ыытарын туһунан куораттааҕы полиция пресс-сулууспата иһитиннэрдэ.

2025 сыл ахсынньы 22 күнүгэр  түүҥҥү рестобарга сылдьан эчэйиини ылбыт киһи  балыыһаҕа  кэлбитин туһунан полицияҕа иһитиннэрбиттэр.    Эдэр киһи илиитин уҥуоҕа тостубут. Барыллаан  быһаарыллыбытынан, эр киһи рестобарга охсуһуу кэмигэр эчэйбит.

Туһааннаах түбэлтэнэн полиция 3-с нүөмэрдээх  отдела РФ Холуобунай кодексын 112 ыст. холуобунай дьыаланы көбүппүт.

Билигин холуобунай ирдэбил үлэһиттэрэ  быһылааҥҥа кыттыгастаах дьону көрдүүллэр,  охсуһуу тахсыбыт төрүөтүн быһаараллар.