РФ Бэрэсидьиэнэ Чуумпу акыйааннааҕы тимир суолу үлэҕэ киллэрдэ

РФ Бэрэсидьиэнэ Владимир Путин X Илиҥҥи экэнэмиичэскэй пуорум чэрчитинэн Чуумпу акыйааннаҕы тимир суолу арыйыыга старт биэрдэ.

Бу суол рекорднай кылгас кэм иһигэр – икки сылынан тутулунна уонна Арассыыйаҕа 531 км уһуннаах бастакы чааһынай тимир суолунан буолла. Бырайыак үлэтин саҕалыыр кэмигэр РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илин федеральнай уокуруктааҕы боломуочуйалаах бэрэстэбиитэлэ, Илиҥҥи экэнэмиичэскэй пуорум тэрийэр кэмитиэтин бэрэссэдээтэлэ Юрий Трутнев уонна Арассыыйа Уһук Илини сайыннарыыга миниистирэ Алексей Чекунков бааллара.

«Илиҥҥи экэнэмиичэскэй пуорумҥа үгэс быһыытынан бөдөҥ тэрилтэлэр уонна бырайыактар үлэлэрэ саҕаланар. Олортон биирдэстэринэн Чуумпу акыйааннааҕы тимир суол тутуута буолар. Бырайыак бүтүннүүтэ чааһынай үбүнэн олоххо киирдэ. 500-тэн тахса килэмиэтир уһуннаах саҥа суолу икки сыл иһигэр туппуттара. Тимир суол хас да тыһыынча киһи дьоруойдуу үлэтинэн, ыарахан килиимэттээх усулуобуйаҕа тутулунна – үлэ алта уон кыраадыстаах тымныыга да тохтообокко ыытыллыбыта. Бу киэҥ далааһыннаах бырайыак Эльгэтээҕи таас чохтоох сири баһылыырга көмөлөһүөҕэ, Саха сирин уонна Хабаровскай кыраай логистикаҕа кыахтарын кэҥэтиэҕэ, бүтүн Уһук Илин экэниэмикэтин күүһүрдүөҕэ», – диэтэ Юрий Трутнев.

Чуумпу акыйааннаҕы тимир суола Уһук Илин үһүс бөдөҥ тимир суолун сүрүн салаатынан буолла – Транссибы уонна БАМы кытта тэҥҥэ. Магистрал 31 км-э Саха сиринэн, оттон 500 км Хабаровскай кыраайынан ааһар. Саҥа суолга 6 күргэ, 18 разъезд, 1 ыстаансыйа, 580 светофор, 220 стрелка, 550-тан тахса инженернэй тутуу киирэр. Чуумпу акыйааннааҕы тимир суол аһарар кыаҕа сылга 50 мөл. туонна чоххо тэҥнэһиэҕэ. «Чуумпу акыйааннааҕы тимир суол – аан дойду таһымнаах тырааныспар-логистика кластера тэриллибит Эльгэтээҕи таас чохтоох сири баһылыыр киэҥ далааһыннаах, комплекснай бырайыак чааһынан буолар. Тимир суол икки эрэгийиэни холбуур: Саха сирин уонна байҕалынан чох терминала тутуллубут Хабаровскай кыраайы ситимниир», – диэн Арассыыйа Уһук Илини сайыннарыыга миниистирэ Алексей Чекунков эттэ.

Бырайыагы көҕүлээччи – «Эльга» хампаанньа логистика комплексын сайдыытыгар 140 млрд солкуобайы укта. 3000 саҥа үлэ миэстэтэ таҕыста. Саха сирин Ил Дархана Айсен Николаев бэлиэтээбитинэн, Чуумпу акыйааннааҥы тимир суол үлэҕэ киириитэ бүтүн дойдуга суолталаах түгэнинэн буолар, бу чох бырамыысыланнаһыгар эрэ буолбакка, бүтүн Уһук Илин, ол иһигэр өрөспүүбүлүкэ, экэниэмикэтигэр күүстээх сайдыыны биэриэҕэ.